Ugatsha lweZimbabwe Prisons and Correctional Services (ZPSC) solulandule imbiko ethi izisebenzi zalo zikhalale umsebenzi koBulawayo yikho lwehluleke ukuthwala izibotshwa luzihambise emithethwandaba etshiyeneyo.
Isikhulumeli salolugatsha uNkosikazi Elizabeth Banda utshele iStudio 7 ukuthi izisebenzi zeZPSC kazivunyelwa ukukhalala umsebenzi; ngakho kungamanga ukuthi lesi yiso isizatho sokwehluleka kwazo ukuhambisa izibotshwa enkantolo.
Wengeze wathi imbangela yikuthi izimota zabo zifile njalo zisalungisiswa okwamanje.
Umantshi osebenzela emthethwandaba weTredgold uMnu Trynos Utawashe walile ukuphendula imbuzo yalumsakazo esithi akavunyelwa ukukhuluma lentathelizindaba.
Abantu abalezihlobo eziyizibotshwa ebezimele zimiswe phambi komthethwandaba baveze ukudana okukhulu ngesehlakalo lesi.
UMnu Henry Khanye ngomunye wabo. Isihlobo sakhe besimele singene enkantolo yeWestern Commonage ngoLwesine.
UKhanye uthe udane kakhulu etshelwa ukuthi isihlobo sakhe kasisabuyi ngemva kokutshona elindile enkantolo.
Your browser doesn’t support HTML5
Udaba Siluphiwa nguBathabile Masuku