Inhlanganiso ebona ngezokhetho eye Zimbabwe Electoral Commission yazise ukuba ibandla leZanu PF linqobe endaweni zonke lapho elicintise khona kukhetho lwamaBy–elections lanxa abenhlanganiso ezisebenzelana lozulu kundaba zokhetho zikhonona, zisithi kunengi okungazange kuhanjiswe ngendlela.
Emhlanganweni lentathelizindaba owenzelwe e Crown Plaza ngoLwesine ekuseni, wokwethula umbiko wazo phezu kwendlela ukhetho oluqhutshwe ngayo, oqoqwe ngumanyano wenhlanganiso ezisebenzelana lozulu kundaba zokhetho owe Zimbabwe Election Support Network, lezinhlanganiso zithi lanxa zisuthisekile kundlela ukhetho oluqhutshwe ngayo kunengi okungaqhutshwanga ngendlela.
Zithi zinanzelele ukuba inengi lendawo zokuvotela zivulwe ngesikhathi njalo impahla yokuvotisa ibikhona.
Umqondisi we Zimbabwe Peace Project engomunye wamalunga aboard yeZESN unkosikazana Jestina Mukoko uthi kodwa bekukhona okungaba phathanga kuhle kulolu khetho.
UMukoko uthi udlakela lokwethuselwa kwabantu kanye labakade bencintisa yinto okumele ilungisiswe njengoba lolu dubo belulukhulu esigabeni se Hurungwe West, bajeziswe kanzima abaphatheka kilo.
Ukuswelakala kwama polling agents endaweni zokuvotela u Mukoko uthi ngenye yezinto abazinanzeleleyo.
Umqondisi wenhlanganiso ye Bulawayo Agenda umnumzana Mmeli Dube ngomunye njalo wamalunga eboard ye ZESN. UDube uthi akumangalisi ukuba abantu kabaphumanga ukuyavhota ngobunengi.
Wengeza uDube ethi luyasilela ulwazi kuzulu, ngakhoke kumqoka ukuba abe ZEC baqhube inhlelo zemfundiso, uzulu azi okumele akwenze anduba aphatheke kukhetho njalo lokuba yiziphi ingwalo okumele azithathe ukuze angaze abuyiselwa muva njengalokho obekusenziwa kwabanye ngoba beze lezingayisizo.
Zivumelene lezinhlanganiso ukuba sikhona isidingo sokuba iZimbabwe Electoral Commission iqhube inhlelo zokufundisa uzulu azwisise ukuqakatheka kokuphatheka kukhetho.
Lumhlangano ungenwe zinkokheli ezivele enhlanganisweni ezimbalwa, ezibalisa eye Zimbabwe Lawyers for Human Rights, Zimbabwe Peace Project, Bulawayo Agenda, ZESN kanye lentathelizindaba.
Abebandla le Movement fo Democradic Change elikhokhelwa ngumnumzana Morgan Tsvangirai bathi bajatshuliswe yikwenza kukazulu ongaphumanga ngobunengi ukuyavhota.
Unobhala jikelele kulelibandla umnumzana Douglas Mwonzora uthi yikho kanye abekade bekukhankasela sonke lesi sikhathi ukuba uzulu akangazihluphi ukuphatheka kukhetho, ize ibe khona inguquko elizweni njengalokho abahlezi bekutsho.