Inhlanganiso ezizimele zodwa ezansi kwezwekazi leAfrica zithe gwaqa lamhla koBulawayo zikhuthaza ohulumende bazo ukuthi baguqule indlela abasebenzisa ngayo inotho yemvelo ukuze ithuthukise impilo yezizalwane zonke njalo baqakathekise izimiso ezipha amandla entuthuko kuzulu lapho kungenwa uhlangano we SADC Summit edolobheni leVictoria Falls ngempelaviki.
Umhlangano kazulu obizwa ngokuthi yiSADC People’s Summit, uqale lamhla koBulawayo lapho uzulu wamazwe atshiyeneyo ezansi kwezwekazi leAfrica athe gwaqa exoxisana ngalokhu ohulumende okumele bakwenze ukuze kuququlwe impilo yobuyanga uzulu wakulumango abhekane layo.
Evula lumhlangano okusethemthweni, umsekeli kamphathintambo okhangela ubudlelwano lamanye amazwe, uMnumzana Christopher Mutsvangwa uthi kuhle ukuthi inhlanganiso ezizimele zodwa zikhulumisane labohulumnende ngokuphathwa kwenotho emazweni atshiyeneyo kanye lendlela ababusa ngayo kodwa kumele zazi ukuthi intando kazulu kumele ibemqoka zikhathi zonke. Uthi umhlangano lo weSADC ozayo, ukhangelele ukuthi kuxoxiswane ukuthi umhlubulo lo wezwekazi ungenza njani ukuze amatshe aligugu kanye lenotho yemvelo ekhona ingaphonguhuquluzwa ngabamanye amazwe kodwa isebenze ukuletha inguquko kuzizalwane.
Omunye wabaqoqi balumhlangano kuleli, uMnumzana Percy Mcijo, uthi kuyadanisa ukuthi lanxa umango lo ugcwele amatshe aligugu ungeke watsho lapho ukhangele impilo ephilwa linengi kuzulu. Uthi kuqakathekile ukuthi inkokheli zamazwe zikhuzane lapho zingaphathi kuhle inotho yamazwe njalo ziqakathekise ukuthi inotho iye ebantwini hatshi ezambeni zenkokheli.
Isikhulumi seSADC People’s Summit, uMnumzana Dalitso Kingsley Kubalasa, owe Malawi Economic Justice Network uthi umbiko abazawuthwala besiya kunkokheli zamazwe uvela ebantwini yikuthi nxa ohulumende befuna ukusebenzela abantu ngeqiniso kumele bakhulumisane labo njalo balalele izikhalazo zikazulu ikakhulu ngensolo ekhona ngendlela inotho yamazwe etshaphazwa ngayo.
Uthi umhlangano lo walamhla ubuphatheke ngokungethembeki kwenkokheli ekuphatheni inotho kanye lendlela ohulumende ababusa ngayo ukuze lapho omongameli bamazwe kanye lezinye iziphathamandla zixoxisana e Victoria Falls zazi imicabango kazulu.
UMnumzana Wandile Dludlu, oweSwaziland ophatheke ekulweleni amalungelo oluntu, uthi uzulu welizwe lakhe udinga usekelo lwamanye amazwe ukuze kukhuthazwe inkokheli zeSADC ukuthi zikhulumisane lenkosi yabo uMswati obaphethe ngohluku. Uthi bayakhala ngokubotshwa kwentathelizindaba kanye lokungavunyelwa kwamabandla aphikisayo ngoba iSADC ikhanya ithule ingaboni hlupho.
Inkokheli zeSADC zihlangana ngeSonto lapho ilizwe leZimbabwe elizasala lingumgcinisihlalo kunhlanganiso le. Abameli abangene lumhlangano bebevela kunhlanganiso ezitshiyeneyo emazweni agoqela iLesotho, Swaziland, Malawi, Zambia kanye leMozambique. Umhlangano lo ophethwe ngaphansi kwe ndikimba ethi Reclaiming SADC for People’s Development- SADC Resources for SADC People, uphela kusasa emini.