Kuliviki siphatha insumansumane eyinsakavukela emaphephandabeni amanengi kulezinsuku, esingakayilokuthi kulumsakazo.
Indaba le imayelana lenhloko kahulumende njalo engumkhokheli welinye lamacele eMDC uMnu Morgan Tsvangirai, yena ovezwa ngamanye amaphephandaba njengendoda engadlulwa yisidwaba.
Iphephandaba leStandard libike kunsukwana ezedluleyo ukuba uTsvangirai wone enye intombazana yakoBulawayo egama layo nguLoreta Nyathi.
ULoreta uleminyaka angamatshumi amabili lantathu, kuthi uTsvangirai, yena ongumfelo, uleminyaka engamatshumi amahlanu lathobamunwe munye, 59.
Iphephandaba leli lithi uLoreta uthole indodana kunyanga ezintathu ezedluleyo wayethesa igama lokuthi Ethan.
Lintombazana ibikwa ibifuna ukusa uTsvangirai emthethwandaba ukuze ithole imaintanance ngoba esala ukunakekela indodana yakhe. Kodwa kubikwa sokube lokukhulumisana uTsvangirai wavuma ukuthi uzayigcina lingane.
Iphephandaba likahulumende eleSunday Mail lona ngempelaviki lethule umbiko obulesihloko esithi 'Bakwethu, kakho na onganceda uTsvangirai ngokumdingela umfazi' (Will someone please find a wife for our PM).
Kuloludaba iSunday Mail iveze uTsvangirai njengendoda ethanda abafazi yethula njalo lomfanekiso wakhe edunyelwe ngesinye isifazana sesilungwini simqabuza.
Iqambe abafazi abacatshangelwa ukuthi sebeke bathandana loTsvangirai ngemva kokutshiywa ngumkakhe ngo2009 ababalisa intombazana yesilungwini le, igama layo elingaziwayo, uArikana Chihombori, uAquilina Kayidza Pamberi, Locadia Tembo, Loreta Nyathi, loLeah Mhundwa.
AbeMDC ekhokhelwa nguMnu Welshman Ncube labo sebesole kakhulu uTsvangirai besithi yindoda engaziphathiyo. Sizamile ukukhuluma labesifazane abalwela ilungelo labo ngodaba lukaLoreta, abagoqela abeMsasa Project, bala ukukhuluma.
Kodwa sicine sesikhuluma lolwela ilungelo loluntu uMnu Zenzele Ndebele, yena othe laye uyakusola kakhulu ukwenza kukaTsvangirai nxa kuliqiniso ngempela ukuthi wona umntwana oleminyaka engu23 yena esefikisa phose engamatshumi ayisithupha-60.
Lalela ingxoxo yethu loNdebele kuhlelo Liphuma Lendaba, Litshone Lendaba.
Nxa kukhona elifuna sikuhlafune kuloluhlelo, sithumeleni i e-mail kukheli ethi studio7@voanews.com. Lingathumela njalo itext message kunombolo ezithi 001 202 465 0318.