Kumbiko owethulwe ngumphathintambo wezemvelo uNkosikazi Sithembiso Nyoni emhlanganweni weGender Forum eGwanda, uNkosikazi Mnangagwa uthe inengi labomama lithwele amagabha avuzayo njalo kuyadingeka ukuthi kuphunywe lamaqhinga azaphathisa abesifazane ngalesisikhathi sokuguquka komumo womkhathi.
UNkosikazi Mnangagwa uthe omama lamantombazana bazifaka engozini yokudlwengulwa lapho bephandela imuli zabo kulandela isomiso esesidale indlala kanye lokusilela kwamanzi. Ngakho-ke uthi kudingeka amaqhinga azalwisana lokuguquka komumo womkhathi.
“Esintwini abesifazane yibo abatheza inkuni, badinge amanzi njalo batheze inkuni ngalokhu impilo yabo igxile kwezemvelo ukuze bazinakekele kanye lemuli zabo.Ezigabeni ezihlaselwe yindlala, omama lamantombazana sebehamba umango omude besiya kukha amanzi ngalokhu bazifaka engozini yokudlwengulwa.”
Lamazwe agcizelelwe ngumgcinisihlalo wekomishini yobulili eyeZimbabwe Gender Commission uNkosikazi Margaret Mukahanana-Sangarwe othi indlala ekhona isidale ukuhlupheka kwabesifazane ngokuphindwe kabili.
“Isomiso esikhona kanye lokugugudeka komhlabathi kulakho ukuphazamisa imizamo esiyenziwe eminyakeni edlulileyo yokulinganisa amathuba abesilisa labasefazane.Omama yibo abathwala nzima ngoba impilo yabo igxile kwezemvelo kodwa bavame ukuthi benganxuswa lapho kuthathwa izinqumo eziphathelane lezemvelo kanye lokuguquka komumo yomkhathi.”
UNkosikazi Latiso Dlamini umabhalane omkhulu esabelweni seMatabeleland South,uthi isomiso esikhona silakho ukutshiya imuli ezinengi zingabayanga ngoba lenkomo sezisifa.
“Eyethu iprovince ingathi ilomnyama yokoma, imnyaka yonke loba kwezinye indawo kulezulu uyezwa thina kuthiwa siledrought manje okwamanje kule El Nino ubunzima sebuphindwe katshumi,hatshi ebantwini kuphela , siyilizwe lenkomo kodwa okwamanje sesifelwe zinkomo ezingu 3 700, ngubani ophathekayo nxa kunje?, ngumama.”
Uzulu ongene lumhlangano uthi kuyadingeka ukuthi uhulumende avuselele amadamu njalo agebhe izikotsho ngobunengi ukuze abantu bengahlupheki ngesikhathi sendlala. Kulabanye njalo abangangenanga umhlangano lo abalemibono efanayo. Omunye wabo ngumsekeli kasodolobho weGwanda, uNkosikazi Sithabiso Mpofu othi izakhamizi zemaphandleni zisengozini ngoba sezinatha lenyamazana.
“Indlovu ziyabuya zizonatha khonapho , omama nxa besiyakukha amanzi babhekane lengozi yokuhlaselwa zindlovu, nxa besiyathezainkuni isishlala abasifunayo yiso njalo esifunwa zindlovu.”
UNkosikazi Sethekele Tshabangu umqondisi wenhlanganiso emela amalungelo abomama lamantombazana eyeWomen Development Association of Zimbabwe iWODAZ uthi inengi labomama lithwele nzima emakhaya.
Ingxoxo yalonyaka eyeNational Gender Forum iqhutshwe phansi kwesihloko esithi: ‘Gender, Environment and Climate Change:Building Resilience and Sustainable Development Through Gender Equality’ njalo ingenwe zingatsha ezitshiyeneyo zikahulumende lenhlanganiso ezizimeleyo.
Forum