Ukaputeni weqembu elimela ilizwe le Zimbabwe emdlalweni kakhilikithi uSean Williams uthi iqembu leli kuzamele libophe ziqine njengoba kulabadlali abathenjiweyo abangasoze bephatheke emidlalweni yalo leqembu lase Afghanistan
Iqembu le Zimbabwe ngoLwesibili likhangelelwe ukudibana lele Afghanistan emdlalweni wakuqala owohlobo le test lingela abadlali abathenjiweyo ababalisa uBrendan Taylor, uCraig Ervine kanye lo Kyle Jarvis.
Ukaputeni weqembu leli uSean Williams uthi akula abangakwenza ngokungabi khona kwabadlali laba njalo bazasebenza ngokukhona.
“Ukungabi khona kukaBrendan, uCraig kanye lo Kyle kusitshiye sisebunzimeni ngoba balolwazi olujulileyo olokudlala umdlalo kakhilikithi ikakhulu owohlobe lwe test.
Ngasikhathi sinye silabadlali abancane abaqoqoda emnyango ngoba sisesimeni esokubumba kutsha iqembu lethu okutsho ukuba abadlali abasakhulayo lithuba labo elokudlala.
Abadlali abangekhoyo isikhala sabo sizakuba nzima ukusivala ngoba bephathisa kakhulu iqembu lethu kodwa iqiniso elikhon yikuba akula esingakwenza ukuze siguqule isimo sokungabi khona kwabo njalo umdlalo kumele udlalwe loba bengekho,” kutsho uWilliams.
UWesley Madhevere ngumdlali osakhulayo ozabe eqala ukudlalela iqembu le Zimbabwe emdlalweni wohlobo lwe test.
Iqembu le Zimbabwe lizadlala imidlalo emibili eyohlobo lwe test leqembu le Afghanistan. Owakuqala ukhona mhla zimbili kunyanga kaMbimbitho kuthi owesibili ukhona mhla zilitshumi.
Ngemva kwemidlalo ye test iqembu le Zimbabwe lele Afghanistan azadibana kumidlalo emithathu eyohlobo lwe One Day International ezaqala mhla zilitshumi lesikhombisa kusithi owesibili uzadlalwa mhla zilitshumi lathoba munwe munye ikanti owesithathu njalo ungowokucina uzadlalwa mhla zingamatshumi amabili kuyo njalo inyanga kaMbimbitho.
Limidlalo idlalelwa esigodlweni selizwe lase United Arab Emirates edolobheni lase Abu Dhabi.
Ngokwakuqala lonyaka ukuba iqembu le Zimbabwe elabesilisa lidlale lamanye amazwe.
