Amapholisa athi abophe umnikazi we-shabhini othengisele abantwana utshwala eHarare ababonakale ku-video enkundleni zokuxhumana benatha bengagqize qhakala, okuyinto ecunule kakhulu uzulu.
Isikhulumeli samapholisa uMnu Paul Nyathi uthi umsolwa nguPhaeteon Mutiyaya oleminyaka yokuzalwa engamatshumi amabili lantathu, 23, njalo uthengisele abantwana laba utshwala eshabhini yakhe eseNenyere Flats elokitshini leMbare.
Abantwana laba balitshumi lambili njalo baleminyaka yokuzalwa esukela kwemihlanu kuphela, 5 years, kusiya kwelitshumi lanye, 11 years.
UNyathi uthi uphenyo lwamapholisa luveze ukuthi abantwana laba bathenga utshwana lobu ngemali ababeyiphiwe njengezipho zeKhisimusi.
Uxwayise labo abathengisela abantwana abaleminyaka ephansi kwelitshumi lasitshiyangalombili, 18, ukuthi bazabotshwa ngoba besephula umthetho.
Umgcinisihlalo wenhlanganiso yezakhamizi eyeHarare Residents Trust uMnu Albert Mazula utshele iStudio 7 ukuthi amapholisa kumele aqinise isandla ebantwini abathengisela abantwana okudakayo.
Forum