Ibandla leMovement for Democratic Change elikhokhelwa nguMnu. Douglas Mwonzora lithi selixoxisana lohulumende kaMongameli Emmerson Mnangagwa ukuze kudingwe indlela yokusebenza ndawonye kumanyano wePolitical Actors Dialogue (POLAD).
Ibandla lika Mwonzora lethule umbiko lo izolo lisithi uMnangagwa usephendule incwadi abayilobe ngeviki ephelileyo bemazisa ukuba bafisa ukukhulumisana laye ngokukhathaza abantu eZimbabwe langomanyano wePOLAD.
Lokhu kwenzakala ngesikhathi ibandla elikhokhelwa nguMnu. Nelson Chamisa lisithi lingeke lisebenzelane lele Zanu PF elithi latshontsha ukhetho ngomnyaka ka2018.
UChamisa waphikisa impumela yokhetho lukamongameli owayiphanyeka emthethwandaba owathi uMnangagwa wanqoba uChamisa kukhetho lolu.
Kusukela ngesikhathi leso, uChamisa lokhu esithi uMnangagwa wangena ngendlela engaqondanga embusweni ngakho-ke kasoze asebenze laye.
Ukuze sihlaziye udaba lolu sixoxe loMnu. Felix Magalela Mafa, umsekeli wesikhulumeli sebandla leMDC Alliance, loMnu. Joseph Tshuma, okubandla leZanu PF.
UMafa uthi akumangalisi okwenziwa libandla leMDC-T ngoba liyingxenye yelibusayo.
Kodwa uTshuma uthi kulungile ukuba uMnangagwa adlelane kahle lenkokheli yamabandla aphikisayo.
