Ibandla leZanu PF lithi kalisebenzisi imali kahulumende emhlanganweni walo oweNational People’s Conference ozakwenzelwa Esigodini esabelweni seMatabeleland South.
UMnu. Obert Mpofu, obona ngenhlelo ezitshiyeneyo kubandla leli uthi kulabantu abanengi kakhulu abasekela iZanu PF ngakho-ke abasebenzisi imali kazulu njengalokhu okukhulunywa ngabanye abantu ebulenjini bokuxhumana obeFacebook, kuTwitter lakuWhatsApp.
“Imali kabana? Abantu bahlala bekhuluma ngemali engayisiyo yabo. Thina silabantu abaxhasa ibandla leZanu PF. Asilasenti kahulumende emalungiselelweni ethu. Silabantu abathanda ibandla abagoqela osomabhizimusi labalandeli bethu abasinika imali ukuze siqhubekele phambili ngomsebenzi webandla.
“Uzafica ukuthi abantu abahlala bekhuluma ngemali ngabantu abangayisiwo malunga ebandla leZanu PF njalo abangakaze bakhuphe kumbe yona isenti kuhulumende lakubandla.Ngabantu abasebenzisa imilomo yabo ukwenzela ukudiliza okwakhiwa ngabanye.”
Ibandla leli lakelasebenzisa imali kahulumende ekuqhubeni imihlangano kowayengumongameli uMnu. Robert Mugabe lomkakhe, uNkosikazi Grace Mugabe, eyokukhulumisa uzulu elizweni lonke jikelele kanye lowe One Million March.
Kwakusetshenziswa imali eyayithathwa esikhwameni sohlangothi lukahulumende olubona ngokuthuthukiswa kwezifundi olweZimbabwe Manpower Development Fund (ZIMDEF).
Ibandla leli lavuma ukuthi lasebenzisa imali le okungekho emthethweni.
Uthe bakhangelele ukuthi uzaqhutshwa ngemfanelo umhlangano webandla leZanu PF Esigodini lapho okuzakuba labantu abedlula inkulungwane ezinhlanu – 5,000.
Umhlangano weNational People’s Conference wenziwa minyaka yonke endaweni ezitshiyeneyo eZimbabwe. Akukhethwa inkokheli yebandla leli ngoba lokhu kwenziwa nxa kungumhlangano weCongress.
