Abalandeli bebandla leMDC bathi akumangalisi ukukhahlanyezwa komkhokheli wabo, uMnu. Nelson Chamisa, okubikwa ukuthi ukhuthwe zinhlamvu izolo eMarondera ngesikhathi ehlanyela izihlahla eDombodombo Clinic.
Bathi kusobala ukuthi ibandla leZanu PF lifuna ukuthi kube lebandla elilodwa eZimbabwe njengalokhu okwakufiswa ngowayengumongemeli umuyi uRobert Mugabe, owalwisana lebandla leZapu waze walifaka ngaphansi kwamakhwapha akhe ngomnyaka ka1987 kuze kwenziwe isivumelwano seUnity Accord phakathi kukaMugabe lomuyi uJoshua Nkomo.
Kwathi kusenziwa isivumelwano lesi iGukurahundi yayisibulele abalandeli bebandla lePF Zapu abafika inkulungwana ezingamatshumi amabili – 20,000.
Abalandeli bebandla leMDC bathi uMongameli Emmerson Mnangagwa kukhanya efuna ukubhidliza ibandla leli ngendlela efanayo ngokukhahlameza inkokheli yalo sonke isikhathi esebenzisa amapholisa lamasotsha amcedisa ukuthi asuse uMugabe esikhundleni.
Bathi okwenzakale eMarondera izolo kuveza ukuthi amapholisa lamasotsha bazimisele ukuvikela uMnangagwa ngazo zonke indlela ezigoqela ukuthi kube lebandla lezombusazwe elilodwa kuphela eZimbabwe okubizwa ngeSilungu ngokuthi yi-one party state.
Bathi umthetho omutsha oweMaintenance of Peace and Order Act unceda ibandla elibusayo ukuthi libuse santando njalo kuvinjwe amabandla aphikisayo ukuthi enze imihlangano lozulu njengalokhu okwakusenziwa nguMugabe kanye lomuyi uIan Douglas Smith esabusa ilizwe leRhodesia.
UDokotela Nkululeko Sibanda, isikhulumeli sikamongameli webandla leMDC, uthi ibandla leZanu PF selifuna ukuthi kubeyilolodwa kwele Zimbabwe ukwenzela ukuthi libuse santando.
Kodwa-ke uMnu. Joseph Tshuma, okubandla leZanu PF, uthi kumele amabandla aphikisayo alandele umthetho nxa efuna ukwenza imihlangano enjengokuhlanyela izihlahla lokunye.