Kulabatsha kubandla leZanu PF asebefuna kuguqulwe isisekelo sombuso welizwe ukwenzela ukuthi uMongameli Emmerson Mnangagwa ahlale esikhundleni kungenela iminyaka elitshumi.
Abatsha laba bathi uMnangagwa wenza kahle ngakho-ke kumele ukuba kwengezwe iminyaka yokuhlala esikhundleni sikamongameli ukuze asebenze ngamandla ekuthuthukiseni ilizwe leZimbabwe.
Isisekelo sombuso welizwe sikubeka sobala ukuba umongameli uvunyelwa ukuhlala esikhundleni engakhethwa kabili okweminyaka elitshumi.
Kungedlula lapho kasavunyelwa ukuvotelwa ngabantu. Abakubandla elibusayo bathi kumele kuguqulwe lokhu ukwenzela ukuthi abantu baqhubekele phambili bevotela umuntu abamfunayo.
Lokhu kutsho ukuthi uMnangagwa ulakho ukugugela njalo ukufela esikhundleni sikamongameli. Amabandla aphikisayo athi okwenziwa nguMnangagwa kwedlula okwakusenziwa ngowayengumongameli umuyi uRobert Mugabe.
Osekela ibandla leZanu PF, uMnu. Elifasi Mashaba, uncoma abatsha abathi kumele kuguqulwe isisekelo sombuso ukwenzela ukuba uMnangagwa ahlale isikhathi eside esikhundleni.
Kodwa uMnu. Mqondisi Moyo, umkhokheli webandla leMthwakazi Republic Party, uthi ibandla elibusayo ligangile.
Lokhu kusekelwa nguMnu. Isaac Mabuka, umgcinisihlalo webandla leZapu.
UDokotela Nkululeko Sibanda, isikhulumeli sikamongameli webandla leMDC Alliance, ulombono ofanayo.
Ohlaziya ezombusazwe, uMnu. Effie Dlela Ncube, uthi akumangalisi okwenziwa libandla leZanu PF.
Isisekelo sombuso welizwe kusigaba sokungamatshumi ayisitshiyagalolunye lanye – Section 91 – sithi umuntu osekewangena esikhundleni sikamongameli okweminyaka elitshumi.
