UMeya wakoBulawayo, uMnu. Solomon Mguni, uthi kumele izakhamizi zisebenzise amanzi ngonanzelelo ngoba malutshwane amanzi emadamu lapho okukhiwa amanzi abantu abahlala edolobheni leli.
Wethule lokhu ngesikhathi abafundisi lezakhamizi bethandazela idolobho leli eLarge City Hall.
UMguni uthe malutshwana kakhulu amanzi emadamu kuthi-ke njalo akhona okungasikhiwa khona amanzi ngenxa yokuthi asetshile.
“… Ngalowumthandazo ka2020 asiceleni kunkulunkulu ngoba idolobho lakoBulawayo lapha amadamu ethu alamanzi afika 34.75%. Amanye amadamu amabili kasasebenzi, uMzingwane leUpper Ncema. Insiza iku37.71%, iNyankuni 51.72% Ncema 18.75% iMtshabezi 58.98%.’’
Kusenjalo, umeli weZimbabwe Council of Churches, uMnu. Lazarus Mpande Khanye, uthi isimo esikhona emphakathini yiso esenze babuthana ukuze bacele kuNkulunkulu ngoba lokhu sokungaphezu kwamandla abo.
“Injongo ukuthi sibelapha ngumthwalo webandla wokuthandaza sithandazela isimo somphakathi ikakhulu sibhekane lokuswelakala kwezulu kuyinkinga ngoba izinto ezinengi ziyawonakala. Amanzi okunatha izinyamazana, abantu nje jikelele kuzaba lihlupho silokujabula ukuthi leyi injongo asiyihambisanga kweyinye indawo siyibeke kuNkulunkulu ukuthi asisize ngamadamu ethu.
“Eyinye yomkhuleko sibhekane layo iBulawayo lokhe silamadamu wonale akhona kodwa izindlu lokhe zisakhiwa ngiyenyi into esibona ukuthi kuyadingeka kulaba abagebha amadamu ukuthi kusizakale kube lamadamu amanengi agejwayo.”
UMfundisi Promise Nyathi, owebandla leChurch of Christ, uthi ulusizi ngoba intsha ayiphatheki emihlanganweni enjengale ephathelane lentuthuko yedolobho labo.
“Siyabonga umhlangano akade silawo namhlanje wokukhuleka sikhulekela uBulawayo omuhle ikakhulu sicela izulu, sikhulekela ukuthula, sikhulekela uthando lokubambana. Okudanisayo yikuthi imihlangano enje isuka ingenwe ngabadala kuphela kanti abatsha bayekela izinto lezi badala kodwa ke ngiyananzelela ukuthi ikusasa ngeyabatsha ngeyabontanga okumele bazilungisele uBulawayo ngendlela abathanda ngayo ,abadala laba izikhathi zabo sezisondele ukuthi badlule emhlabeni.”
Abafundisi baveze ukuzimisela kwabo ukuthi bathandazele idolobho lakoBulawayo ukuze kubelokuthula njalo lithuthuke.
