Iqembu lenguqu eleDemocratic Republic of Congo linqobe eleZimbabwe Warriors 4-0 ngeSonto kumncintiswano walonyaka owenkezo yeAfrica Cup of Nations odlalelwe enkundleni ye30 June Stadium kwele Gibhite.
Unozinti uElvis Chipezeze udlale okutshiye abanye bebambe owangaphansi ngoba ubelibamba eliyekela kungani uphethe isikhuni esitshisayo. Lokhu kwenze ukuthi eleCongo lihlohle kulemizuzu emine kuqale umdlalo lo. UJonathan Bolingi wakwele DR Congo ulithele emambuleni uChipezeze eyehluleke ukubamba ibhola ebelipholile.
Uphindile njalo uChipezeze sekulemizuzu edlula amatshumi amathathu. Wehluleke ukulibamba njalo ibhola ebelikhahlelwe ngomunye umdlali wakwele Congo. Ulithele emambuleni uCedrick Bakambu obone ukuthi uChipezeze ubevuza engani ligula elingela munge.
Iphindile njalo emhlolweni uChipezeze aze alahle phansi umgadli wakwele Congo. UBakambu utshayele emambuleni umbekwa odalwe nguChipezeze.
Bezinetha okumangalisayo kwele Zimbabwe. Ele DR Congo liphinde lahlohla njalo sokusele isikhatshana ukuthi umdlalo ufike emaphethelweni. UBritt Asombalonga ulithele emambuleni ebona ukuthi kubhobokile egedini leZimbabwe Warriors.
Asenelisanga ukukhuluma ngodaba lolu lomqeqetshi weqembu leWarriors kanye leziphathamandla zenhlanganiso yenguqu eyeZimbabwe Football Association.
UMuziwethu Hadebe, ingcwethi kwezemidlalo uthi kuyethusa okwenzakale eGibhite lapho obekukhangelelwe ukuthi iqembu leZimbabwe lizangena kusigaba esilandelayo somncintiswano weAFCON.
