Usufike kuhlandla lama quarter finals, umncintiswano weWafa Wafa, odlalwa ngamaqembu asesigabeni seSouthern Region Division One.
Uqhubekela phambili umncintiswano weWafa Wafa kulimpelaviki kulemidlalo emibili ezadlalwa ngoMgqibelo kuthi eminye emibili ikhangelelwe ukuba idlalwe ngeSonto.
NgoMgqibelo iqembu le Casmyn lizemukela ele Indlovu Iyanyathela enkundleni yeTurk Mine kuthi ngase Colliery kulempi yomdeni phakathi kweqembu leZPC Hwange kanye lele Hwange elaziwa kakhulu ngegama elithi Chipangano.
Umqeqetshi weqembu leHwange, uBongani Mafu, uthi lumdlalo uzambonisa ukuba iqembu lakhe lisesimeni esinjani phambilini kokuqala kwemidlalo yeligi ekuqaleni komnyaka ozayo.
“Silethuba elokudlala lethimu enkulu abayibiza ZPC Hwange ngesabatha elizayo. Lumdlalo ngiyawuthabela kakhulu ngoba uzasipha lathi ithuba njenge Hwange ithimu elembali ende ukuthi sibone ukuthi ithimu leyi singayivusa ibuyele lapho eyayikhona.
"Nxa izabuyela lapho eyayikhona kuzamele ingqikilane lezinkulu zakhona. Kulesi sigaba esikuso i ZPC Hwange yizo ezinkulu zakhona yikho sizayimela, sizame, sibone ukuthi kuyalunga, kufuna ukulungiswa kumbe sekulungile. Sithemba umdlalo uzakuba muhle abantu bekholise ngoba kade bacina ukubukela ibhola enkundleni ye Colliery.”
NgeSonto iqembu leBosso 90 lizadlala lele Ajax Hotspurs kuthi ele Arenel lizadibana lele Emakhandeni Pirates.
Yomibili limidlalo izadlalelwa enkundleni yeWhite City esedolobheni lako Bulawayo.
Umncintiswano weWafa Wafa uzakuma udedele ikhefu leKhisimusi kodwa ukhangelelwe ukufika emaphethelweni kungakaqali imidlalo yeligi ngenyanga kaZibandlela.
Iqembu elizaphakamisa inkezo lizathola inkulungwane ezintathu zamadola aseMelika kuthi lelo elizaphutsha lisendaweni yesibili lizathola inkulungwane ezimbili zamadola aseMelika.
Amaqembu azaphelela kusigaba se semi – final azathola inkulungwane eyodwa lamakhulu amahlanu kuthi lawo azaphelelwa ngumphako kusigaba se quarter – final azathola amadola angamakhulu amahlanu.
Amaqembu ahle aphuma kusigaba sakuqala esomncintiswano kawatholi ngitsho ipeni elilesikhala.
Kolunye udaba olumayelana lomdlalo wenguqu, imidlalo yeCastle Lager Premier Soccer League obekumele idlalwe ngempelaviki eyedluleyo ikhangelelwe ukuba idlalwe kulimpelaviki nxa kungabanga labadlali abanengi abatholakale belomkhuhlane weCovid – 19.
Inhlanganiso ye PSL ihlele ukuba ngoLwesihlanu iqembu leHarare City lingqikilane lele Yadah ngase National Sports Stadium, ngoMgqibelo iqembu le Chicken Inn lizadibana lele Tenax ngase Luveve, eleBlack Rhinos lizadlala lele Caps United ngase National Sports, eleWhawha lizemukela eleBulawayo City ngase Ascot kuthi eleZPC Kariba lizadibana lele Triangle ngaseNyamhunga.
NgeSonto iqembu le Manica Diamonds lizangqikilana lele Highlanders ngase Sakubva, ele Dynamos lizadlala lele Cranborne Bullets ngase National Sports Stadium kuthi ele Bulawayo Chiefs lizadlala lele FC Platinum ngase Luveve.