UMongameli Robert Mugabe wethule umbiko wakhe wezinqumo ezilitshumi athi yizo ezizaphathisa ekuthuthukiseni umnotho welizwe, inguquko emthethweni wezezisebenzi kanye leminye, njengendlela yokuhuga osomabhizimusi bakwamanye amazwe ukusungula eZimbabwe.
Ukwenze lokhu lanxa ubehozwa ngabamabandla aphikisayo ngesikhathi ewethula lumbiko.
Ukusungulwa ngokugcweleyo kohlelo lokuthuthukisa umnotho, olwe ZimAsset, ukuvuselela ezokulima kanye lokuba ilolongwe kuleli impahla, ngokunye obekumunyethwe ngumbiko kaMugabe awethule okwemizuzu engamatshumi amabili lane.
Ingcitshi zombusazwe kanye lezenhlalakahle kazulu ziyisolile linkulumo zisithi akula okutsha akwethuleyo.
Umnumzana Sibusiso Mguni oyisakhamuzi seMhandara uthi udaniswe ngumbiko kaMugabe ngoba kungela okulomsobho akukhulumileyo, edlala ngengqondo zabantu beZimbabwe yabasebunzimeni ngenxa yesimo somnotho esibangelwa yibukhokheli bakhe obungaqondanga.
Wathi lalokho abekukhuluma phezu kokuqeda udubo lokungathembeki kwenkokheli yamankampani kahulumende, kuyinkulumo nje ngoba engekho ozajeziswa njengenhlalayenza, bezaqhubeka bezithaphuzela inotho yelizwe, uzulu esidla imbuya ngoluthi.
Umnumzana Mlondolozi Ndlovu ngomunye njalo wengcwethi kwezombusazwe oveze ukukhathazeka ngalenkulumo kaMugabe, ayichaze njenge ze.
Wengeza uNdlovu ethi lesimo sikamongameli ngesikhathi ewethula lumbiko, ubusitsho okwehluke kulokho bekuphuma emlonyeni wakhe.
Umongameli Mugabe uthi umnotho welizwe uqhubeke uthuthuka lanxa isimo singesihle, wabonga abezomvikela ngokulondoloza ukuthula elizweni.
Okunye kokulitshumi athi yikho okumqoka uhulumende afisa kulandelwe ukuthuthukisa inotho yelizwe, kubalisa ukuthuthukisa ezokulima, ezokwakha, ezamandla kagetsi, amanzi lezokusetshenziswa kwemitshina yakulezi nsuku yamacomputer.
Ukuthukiswa kwamabhizimusi amancinyane,ukukhuthazwa kokuphatheka kwamankampani azimeleyo,ukuvuselelwa kohlangothi lwezamabhanga, ukumanyana kukahulumende labamankampani azimeleyo, ukuguqulwa kwemithetho yezisebenzi kanye lokulwisana lokungathembeki.
Kube lokuxokozela edale lephalamende phakathi kwabamele amabandla atshiyeneyo ekada bengavumelani lokwethulwe nguMugabe.
Ibandla leMDC-T lisole imbiko kaMongameli Mugabe lisithi kayila sisindo ngitsho njalo itshengisa ukuthi uMugabe lohulumende wakhe kabasela macebo okuhlenga ilizwe ebunizimeni elikubo.
Embikweni owethulwe ebulenjini lelibandla lithi uMongameli Mugabe kaboni ukulahlekelwa yimisebenzi lokuthwalanzima okwenziwa nguzulu.
Lebandla le MDC Renewal Team lalo lithi imbiko kaMongameli Mugabe kayiphathisi ilizwe lakancinyane ngoba uhlelo athi yi ten point plan kalusoze lusebenzi.
Ukuhlaziya amazwi kaMugabe uChris Gande weStudio Seven uxoxe lobona ngokuqoqa inhlelo zebandla leMDC-T, uMnu. Abednico Bhebhe.
