Omele ilizwe leRwanda kwele Zimbabwe uthi kumele abantu bahlalisane ngokuthula langothando ukwenzela ukuthi ibutho lingagangadi uzulu njengalokhu okwenzakala elizweni lakhe. Ilizwe leRwanda lifikisa iminyaka engamatshumi amabili lanhlanu (25) kulandela ukubulawa kwamaTutsis ngama Hutus.
UMnu. James Musoni wethule lokhu eHarare izolo ngesikhathi kuthanyelwa emigwaqweni edolobheni leli yiziphathamandla zekhansili, ezikahulumende labadabuka kwamanye amazwe.
“Esakufundayo yikuthi kumele abantu basebenze ndawonye, bathandane. Okuqakathekileyo yikuthi abantu bamanyane. Ngiyakwazi ukuthi umongameli welizwe leZimbabwe uyazama ukuthi lokhu kwenziwe. Kwabulawa abantu kwele Rwanda ngoba kwakulenzondano emangalisayo. Abantu babengathembani. Okunye njalo okuqakathekileyo yikuthi ukulumende ahlolisiswe akwenzayo njalo abakuhulumende babuse kahle.”
Kwabulawa abantu abafika phose isigidi – 800,000 ngomyaka ka 1994 kubangwa ubuhlobo obabusenza ukuthi amaTutsis engadlelani kahle lama Hutus. Kwele Zimbabwe kwabulawa abantu abafika inkulungwane ezingamatshumi amabili – 20,000 yiGukurahundi eMatabeleland leNkabazwe ilizwe lisanda kuthola uzibuse. Abantu abanjengo Mnu. Roma Nyathi owalwa impi yenkululeko uthi uhulumende kumele axolise ngombhuqazwe weGukurahundi.
Kambe eZimbabwe kungaba lokuthula na okungenza ukuthi uhulumende engabulani abantu mahlayana? UMnu. Clement Moyo olwela ilungelo loluntu uthi kaboni uMongameli Emmerson Mnangagwa ekhulumisana loMnu. Nelson Chamisa lamanye amabandla aphikisayo ukwenzela ukuthi abantu bakhumisane umlotha.
UMnu. Joseph Tshuma okubandla leZanu PF uthi ukukhumisana umlotha lokulungisa ezombusazwe ezihluphayo eZimbabwe kungenziwa nxa abantu abanjengo Chamisa bengavuma ukuthi banqotshwa nguMnangagwa kukhetho olwenziwa ngomyaka ophelileyo.
UMnangagwa usanda kwethulela uzulu umthetho weNational Peace and Reconciliation Commission Act okhangelelwe ukuthi uzathoba izolonda zalabo ababulawelwa izihlobo zabo ngesikhathi seGukurahundi langesikhathi kusenziwa ukhetho selokhu ilizwe lathola uzibuse.
