Ilanga lifiphle ngoMvulo kwele Melika lapho olulendawo ezingengi eziphenduke zama mnyama tshu ilanga ligwaze umhlaba.
Ukufiphala lokhu lapho inyanga evale ilanga kwaphenduka kwabayibusuku emini kuqalise eOregon kwalandela indawo ezigoqela isabelo seIdaho, Wyoming, Nebraska, Kansas, Missouri, Illinos, Kentucky, Tennessee, North Carolina, Georgia leSouth Carolina.
Edolobheni lePowdersville esiseduzane leGreenville esabelweni seSouth Carolina ukufiphala kwelanga kuqalise ngo1:07pm kwaze kwayafika ihola lesine – 4:07pm.
Abantu abanengi abevela phose indawo zonke zeMelika babuthane emagcekeni eCentral Park lezikolo ezitshiyeneyo eGreenville lePowdersville South Carolina lapho okufiphale khona ilanga okwenze ukuthi inyoni ziqalise ukubuyela ezihlahleni okwesikhatshana njalo lezimota zilayithe izibane.
Lokhu kumangalisa abantu abanengi abagoqela uMnu.Tshaka Tshabalala, isizalwane seZimbabwe esihlala ePowdersville, othe isehlakalo lesi sitshiye uzulu ebambe owangaphansi.
“Kuyamangalisa kakhulu lokhu. Ngilibone libola ilanga kwaba mnyama tshu. Leyoni lazo zicine zibuyela ezihlahleni kwathi abantu abatshayela izimota abanye bazimisa kwathi abalesibindi batshayela belayithe izibane.”
UTshabalala uthe esintwini kuthiwa ukubola kwelanga kuhlola ukuthi kulesehlakalo esimangalisayo esizakwehlela umhlaba kumbe ilizwe lapho okufiphele khona ilanga.
“Abadala basitshela ngalokhu lobanje thina abanye silandela lokhu okuthiwa yi-science. Esikwaziyo yikuthi yisehlakalo esenzakala sokudlule isikhathi eside.”
Ezinye izizalwane zeMelika zithe zijabule kakhulu ukubona ilanga lifiphala ngakho zizatshela izizukulwane ngesehlakalo lesi.
Omunye wabo nguMnu. John Canover oleminyaka yokuzalwa phose engamatshumi ayisificaminwe mbili lasikhombisa (87) othe ukholise okumangalisayo lomkakhe uNkosikazi Victoria Canover.
“Sibukele saze zabambana izandla lekhosikazi lami. Bekukuhle kakhulu sibili. Sibone lenyoni sezibuyela ezilungwini ngoba kube mnyama tshu lapha.”
Banengi njalo ababone ilanga lifiphala abathe gwaqa endaweni ezinjenge Powdersville leGreenville abathe bakebakhohlwa okwemizuzwana ngokwezakala eMelika kwezombusazwe.
Kodwa-ke uMnu. Franklin Zalech ohlala elokitshini lePowdersville uthe akumelanga abantu bakhohlwe ngokwenzakala eMelika ngenxa yemizuzwana yelanga lifiphele.
“Sikubonile kodwa akumelanga sikhohlwe ukuthi ilizwe leMelika libhekane lenhlupho ezinengi okumangalisayo ezigoqela inkethabetshabi. Lokhu esikubonileyo kuyafana nje lokugada umtshelelo obizwa ngokuthi yi-roller coaster.”
Ukufiphala kwelanga okunje lokhe kwacina ukubakhona eMelika