Ingcwethi kwezombusazwe zithi ukhetho lweZimbabwe lulakho ukuthi lungaqhutshwa ngemfanelo ngenxa yezinto ezinengi ezingakenziwa nguhulumende kaMongameli Emmerson Mnangagwa ngesikhathi kulungiselelwa ukhetho oluzakwenziwa ngoNtulikazi lonyaka.
Lokhu kuphume emhlanganweni owenzelwe eWashington DC izolo obuhlolisisa isimo sezombusazwe kwele Zimbabwe njalo lokungenzakala sokwenziwe ukhetho.
Umhlangano lo ubuqoqwe yinhlanganiso yeInternational Republican Institute lezinye inhlanganiso.
Omunye walabo abakhulume emhlanganweni lo nguMnu. Ibbo Mandaza, umqondisi wehlanganiso yeSouthern African Political and Economic Series Trust, othe ukuswelakala kogwalo lokuvota ngokunye okungenza ukuthi ukhetho oluzayo lungenziwa ngemfanelo.
Ngakho-ke uthi abantu bachitha iSikhathi ngokuvota kukhetho oluzayo
“Ngibona engani ukuqhuba ukhetho kwele Zimbabwe yikuchitha isikhathi. Khathesi nje ukhetho yinto yabantu abafuna ukubusa hatshi intando kazulu. Bafuna ukuthi isikhathi singafika benze ukhetho. Esikubonayo yikuthi uhulumende kalungiselelanga ngemfanelo ukhetho oluzayo. Akukalungiswa ugwalo lwe voters’ roll njalo kunengi okulokhe kungakalungiswa kusukela ngomnyaka ka2013 kuze kwenziwe ukhatho olwaluvinjwe yinkokheli yeZansi yezwekazi leAfrica.”
Uthi okunye okuhluphayo yikuthi ibutho leZimbabwe lifuna ukungena kwezokhetho.
“UMugabe wehluleka ukulungisa konke okuhambelana lomuntu okwakumele athathe isikhundla sakhe. Wacina esuswa esikhundleni libutho. Okwamanje siyabona ukuthi ibutho lokhe lihlupha. Okuhlupha eZimbabwe yikuthi kumele ibutho lingangeni kwezombusazwe ngitsho lakancane.”
Lokhu kusekelwe nguMnu. Alex Magaisa, owenza izifundo njalo esebenza kunhlanganiso yeNational Endowement for Democracy, othi ibutho kukhanya lisebenza lenhlangothi ezinengi kwele Zimbabwe lapho okungalandelwa khona imithetho.
“Nxa ukhuluma ngokwenziwa libutho kumele sikhulume langokwenzakala kuhlangothi lukahulumende olwe Zimbabwe Revenue Authority njalo ngokwenzakala emthethwandaba, okwenziwa zinduna ezisanda kumiswa ukuthi zikhulume ngezombusazwe lokunye okufanayo.”
UMnu. Thomas Hastings, ophethe isikhundla somqondisi wonhlangothi lweMelika olubona ngokudlelana lamanye amazwe olwe U.S State Department, uthi kulokunye okwenziwa kahle nguhulumende kaMongameli Emmerson Mnangagwa lobanje kungakalungiswa okunengi okufiswa nguzulu ngesikhathi sokhetho.
“Siyakwamukela konke okwenziwa nguMongameli Mnangagwa. Sihlolisisa konke akwenzayo. Asikhangeli afisa ukukwenza kuphela kodwa sihlonisisa okutshiyeneyo. Sihlolisisa ezokhetho lokunye okutshiyeneyo.”
Uphinde wathi okuhlupha uzulu eZimbabwe yikungavezwa okusemthethweni kogwalo lokuvota olwe voters’ roll.
“Sesike sakhuluma ngodaba lwe voters’ roll. Abantu beZimbabwe sebekhulume kakhulu ngodaba lolu ngoba bafuna ukubona okuphakathi kogwalo lolu lokuvota. Abantu lamalunga enhlanganiso ezizimele zodwa bafuna ukubona okuphakathi kogwalo lolu. Konke lokhu akukenziwa.
“Kuyafunakala njalo ukuthi kubelokudlelana okuhle phakathi kwamabandla ezombusazwe kanye lamaphephandaba lemisakazo engaphansi kukahulumende. Sifisa ukubona kusenzakala lokhu. Abantu bakhala njalo ngokubalwa kwamavoti. Bafuna ukubakwazi ukuthi kuzakwenziwa njani. Abaqhuba ukhetho bathule zwi ngodaba lolu.”
UMnu. Handel Mlilo, isizalwane seZimbabwe esihlala eMelika obesemhlanganweni lo, uthe abantu besaba ukuthi ukhetho kalusoze luqhutshwe ngemfanelo.
Loba kunjalo, uMlilo uthi abantu akumelanga balahle ithemba.
Kasenelisanga ukukhuluma leziphathamandla zeZimbabwe Electoral Commission lezikahulumende ngokwethulwe emhlanganweni lo.
