Amakhansila ambalwa asethethe isinqumo sokumisa umsebenzi umabhalani wekhansili yakoBulawayo, uMnu. Christopher Dube, owetheswa umlandu wokwehluleka ukuthi kubelamanzi eneleyo edolobheni njalo lokungasebenzisi imali yezakhamizi ngemfanelo.
UDube ulotshelwe incwadi yokumiswa umsebenzi ngobambe isikhundla sikameya okwesikhatshana, uMnu. Tinashe Kambarami.
UDube uthi kayindawo njengoba emiswe umsebenzi okungekho emthethweni ngoba yena ulakho ukumiswa umsebenzi ngumeya hatshi umsekeli wakhe lamakhansila.
Uthi kusobala ukuthi umiswe umsebenzi ngamakhansila afuna ukufaka umuntu wabo esikhundleni sikamabhalani wedolobho leli.
Konke lokhu kwenzakala ngesikhathi umeya, uMnu. Solomon Mguni, ekukhefu elifitshane njalo esanda kuthembisa ukuthi uzakhuluma lalabo abalobe incwadi besithi kumele uDube athoniswe amacala ambalwa agoqela lelokuthi akusetshenziswanga ngemfanelo imali yezakhamizi ebizwa ngokuthi yiRetention Fund.
Kasenelisanga ukukhuluma loKambarami obengaphenduli umakhalekhukhwini wakhe.
UDube utshaya phansi ngenduku esithi kayindawo lobanje uKambarami labanye bakhe abane bevale ngci amawofisi akhe besithi kumele ahlale ngekhaya engatholi leholo lakhe.
Kulamanye amakhansila athi kawazi lutho ngodaba lolu. Omunye wabo utsheye umsakazo weStudio 7 ukuthi "kunzima lokhu ngoba kulabanye bethu abenza izinto ezingekho emtthwethweni.
"Ngodaba lolu, ngizwe ngokwenzakale kunobhala wethu ebulenjini bokuxhumana ..."
