Kuyaxokozela kubandla leMDC-T kulandela okwethulwe nguNkosazana Thokozani Khupe ngoLwesihlanu, obike ukuba nguye osekhokhela ibandla leli ngoba uMnu. Douglas Mwonzora uzixotshisile kulo ngokuthi ukhokhela ibandla leMDC Alliance.
Abantu balemibono etshiyeneyo ngodaba lolu ngesikhathi uMwonzora esithi lokhu ekhokhela ibandla leli ngoba wamisa uMaKhupe ukuba lilunga lebandla leMDC-T ngoLwesine.
UMaKhupe uqhubekela phambili esithi uxotshe uMwonzora ngenxa yokuthi ulobe incwadi ebikela iZimbabwe Electoral Commission ukuba nguye osekhokhela iMDC Alliance. UMaKhupe uthi ucela abantu bemsekele njalo uhulumende ledale lephalamende bengangeneli kuloludaba.
Kodwa uMwonzora uthi uMaKhupe wenza okungekho emthethweni njalo usemiswe okwesikhatshana ukuba lilunga lebandla leMDC-T. UMnu. Witness Dube, obona ngokwethulwa kwemibiko kubandla leli uthi abantu ezabelweni ezinengi basekela uMwonzora. Uthi uMaKhupe udlala ngabantu.
UMnu. Ntando Ndlovu, umcebisi kaMaKhupe, uthi abantu abanengi bayamsekela.
Lokhu kusekelwa njalo nguMnu. Lungani Ndebele, unobhala webandla leMDC-T koBulawayo, othi uMaKhupe ulandele isisekelo sombuso webandla ngoba kuyikho abakuthembisa uzulu.
"Ngifuna ukukubeka kube clear ukuthi khona uMaKhuphe kaphumanga ndawo ukuthi kumbe ufome ifaction. Kulabanye bethu abaphumileyo kusisekelo sombuso thina lomama uMaKhuphe sikubone kungafanelanga ukuthi siyenze ngoba zazimisela ukulandela i constitution, yonke indlela esilwa ngayo emthethweni.lbandla lilezinqumo zalo ezilisebenzisayo so nxa abakhokheli sebephumile ezinqumeni zebandla yikho ke okwaliwe ngumama uMaKhuphe lokhu.”
UNkosikazi Wayne Fuyane, umhlali wakoBulawayo, laye usekela inyathelo lika MaKhuphe.
“Isinqumo esenziwe ngumama uMaKhuphe ngisibona siqondile, kuhle ukuthi lathi esisemhlubulweni we Matebeleland sibe lenkokheli evela kithi ngapha kulokuthi sibuswe yilaba abavela komunye umhlubulo. Nxa sikhangela kulobandlululo nxa izinto zisenziwa kodwa lathi singaba lomuntu osimelayo ngikubona kukuhle. Okunye okuhle yikubana ngowesifazane, isikhathi esinengi umuntu wesifazane uyeyiswa ukuthi angaba yinkokheli, kodwa lokhu akwenzileyo kuyakha i Women empowerment kungaba kuhle ukumbona esiba nguMongameli sibone ukuthi ilizwe leli angalithuthukisa njani.”
Kulabanye abasola okwenzakaa kubandla leli. Omunye wabo nguMnu. Mlamuli Sitsha.
“Isenzo sikamama uKhuphe asimangazi ngoba ungakhangela ukukhuphuka kuka Mwonzora ekubeni abengumkhokhele webandla le MDC-T kwabakhona ingxabangxoza lapho umama uKhuphe ayesala ukuthi unqotshiwe. Kukhanya leli iqhubu belingaphelanga, kulobudlwangudlwangu obukhona. Kuphinde kusitshengise ukuthi ibandla eliphikisayo ele MDC-T alihlelekanga njalo lilabantu abathanda ukubusa angiboni lisiba lefuture kwezombusazwe kwele Zimbabwe.”
Kulabanye njalo abasekela uMwonzora. UMnu. Thulani Khumalo, umhlali wakoBulawayo, uthi Mwonzora nguye owakhethwa ngabalandeli bebandla leli.
"Sahamba ku congress kwaphuma ukuthi uDouglas Mwonzora nguye onqobileyo kukhetho lolu. Singathi siyakhangela siyabona ukuthi kulezinye izihwaba ezisuka zibe khona ezifuna ubukhokheli ezingafuni ukuvuma impumela yokhetho.Yikho lokhu esikubonayo khathesi ukuthi uDr Khuphe sethe selelakhe ibandla eceleni lokhu kungenxa yokungafuni ukuvuma ukuthi omunye ulakho ukuthi akhokhele. Thina sibona uMwonzora enguye okhethiweyo ngoba kunguwe owaphumayo enqobile.”
UNkosikazi Betty Thwala, umsekeli kamgcinisihlalo eMatabeleland North kubandla ele MDC-T, ukhiphe umbiko wokuba abavumelani lesinqumo sika MaKhupe esokuvula elinye ibandla leMDC-T.
Ukubeke sobala ukuba bami loMwonzora. Sebexabana esabelweni seMatabeleland South ngokwenziwe nguMaKhupe. Ezinye izabelo kubikwa ukuba zisekela uMwonzora loba kukhanya engani kulabantu abasabalalisa imibiko yamanga ngodaba lolu.