Izikolo ziyavulwa ngoMvulo eZimbabwe ababalisi lezifundi bekhala ngokuswelakala kwamanzi lokunye okungabavikela kumkhuhlane weCOVID-19.
Abafundi ababhala imihloliso yokuphutsha izinga lika Grade 7, uForm 4 kanye loForm 6 bayaqala ukufunda kusasa ezikolo zikahulumende okubikwa ukuthi ezinye kazilampahla eyeneleyo eyokuvimba ukumemetheka kwegciwane leCoronavirus.
Umbalisi, uNkosikazi Sakhile Dube, uthi kunzima ukuthi izikolo zithole imali yokuthenga ezikufunayo.
“Kudingakala ama sanitizer, ama sepa okugeza izandla, amapenda okumaka isocial distancing lamadisefectants lokunye okunjalo ukwenzela ukuthi izikolo zivulwe okuzakwenza sivikele umkhuhlane weCorona. Izinto zonke lezo zifuna imali. Izikolo zithola imali ebazalini through the payment of fees, izikolo lokhe zavalwa ngoMarch abazali bebelokhe bengabhadali if ees so izikolo ukuthi ziraise imali yonke yonaleyi zibeready ukuthi izikolo ukuthi zivule kunzima. In a way izikolo zonke azikabi ready ukuthi zivule ngenxa yesizatho sonaleso ukuthi kutholakale lezizinto.”
Lokhu kusekelwa nguMnu. Richard Moyo, umbalisi ohlala koBulawayo ofundisa esikolo seRobert Sinyoka.
Abazali abanengi bathwele amehlo ngokungenzakala ezikolo. UNkosikazi Evidence Dube, olomtwana okumele abuyele esikolo kusasa uthi kuhle ukuthi izikolo zivulwe kodwa indleko zakhona ezifunekayo zinengi kakhulu.
“Sikwamukela ngesihle ukuthi izikolo ziyavulwa abantwabethu besebediniwe ngokuhlala ezindlini kodwa inkinga esilayo yikuthi ama fees akhona there are so exorbitant asiboni sizayenelisa ukubhadala. Mina nginje ngisebenza kuhulumende ngihola 5,000 RTGS ende isikolo umtanami afunda kiso bathi bafuna 28,000 RTGS. Ngiyazibuza ukuthi esiyafika esikolo ngiyazibuza ukuthi ngiyabe sengiyitshontshe kobani. Lokhu kubuhlungu. Phezu kwe 28,000 RTGS kuzwakala kufuneka Ius$50 mina engingayiholiyo.
"Nxa uhulumende engangenelanga abantwabethu bazamele bahlale ezindlini bangayifunda. Imali yokuthi ngimnike eyokudla ayikho, itransport bathi bafuna iforex mina engingelayo. So, kunzima lokhu asazi ukuthi kuyozala nkomoni ngoba lapha esiyakhona asikwazi.”
Esinye isifundi, uPrince Nyathi, uthi ukukhuphuka kwenhlawulo yezifundo kuyabadanisa ngoba abazali kabala mali.
“Ngiyajabula ukuthi izikolo ziyavulwa kodwa lapha esisuka sidane khona yikuthi sizwa kuthwa ama fees lapho sivula ayabe esekhwelile okokuthi abazali bethu bengayehluleka ukuthi besibhadalele. Kuyasidanisa ngoba besesihlezi isikhathi eside singafundi kuzakuba khona ukuthi lathi sifunde sibe lekusasa elihle ngakho-ke siyacela ukuthi ama fees akhona abazali bethu bawayenelise ngoba sifuna ukufunda.”
Izikolo zavalwa ngoMbimbitho lonyaka kusenzelwa ukuvinjwa ukumemetheka komkhuhlane weCOVID. Idolobho lakoBulawayo libhekane lohlupho lwamanzi njalo izikolo ezinengi kazilamanzi lokunye okumele kusetshenziswe ukwenzela ukuthi abantu bengathelelani umkhuhlane weCOVID-19.
