Amapholisa eZimbabwe adinga uMnu. Sybeth Musengezi owaphanyeka udaba edale leHigh Court esithi kumele uMongameli Emmerson Mnangagwa asuswe esikhundleni somkhokheli webandla leZanu PF ngoba kakhethwanga ngemfanelo ngomnyaka ka2017 kusuwa esikhundleni owayengumongameli umuyi uRobert Mugabe.
Igqwetha lakhe, uMnu. Nqobani Sithole, uthi amapholisa afike emzini kayisezala eBudiriro eHarare mhlaka 5 Zibandlela babatshela ukuba bayamdinga. Kabatshongo ukuba bafunani kuMusengezi.
USithole uthi sebelobele incwadi amapholisa eHarare becela ukubakwazi ukuthi bamdingelani uMusengezi njalo bengamhambisa nini eHarare Central Police Station.
UMusengezi uthi wethukile kakhulu loba yena engawabonanga amapholisa la ngoba ulakho ukuthunjwa kulandela ukwethuselwa kwakhe ngamagqwetha kaMnangagwa athi kumele alususe udaba lolu emthethwandaba.
UMusengezi uthi uMnangagwa kakhethwanga ngemfanelo ngomnyaka ka2017 ibutho lisusa uMugabe esikhundleni.
Kasenelisanga ukukhuluma lesikhulumeli samapholisa, uAssistant Commissioner Paul Nyathi, obengaphenduli umakhalekhukhwini wakhe.
USithole uthi uMusengezi uzaqhubekela phambili ngodaba lolu emthethwandaba.
