Isithunywa senhlanganiso yamazwe wonke omhlaba jikelele eyeUnited Nations sithi abantu kwele Zimbabwe babhekane lendlala emangalisayo okukhanya ibangelwa nguhulumende kaMongameli Emmerson Mnangagwa lesikhudumezi somkhathi esaziwa ngokuthi yi-climate change.
UHilal Elver, oyiSpecial Rapporteur obona ngelungelo likazulu lokuthola ukudla obehlolisisa okwenzakala eZimbabwe okwamalanga alitshumi lanye, uthi kuyethusa okwenzakala elizweni leli ngoba abantu ababhekane lendlala basemaphandleni kanye lemadolobheni.
Uthi konke lokhu kwenzakala loba ilizwe leZimbabwe lilemithetho ekhuthaza ukuthi abantu bathole ukudla njalo kulondolozwe ilungelo labo.
“Abantu abedlula isilinganiso esingamatshumi ayisithupha ekhulwini, 60%, abaselizweni elaliphandela ukudla amanye amazwe kuzwekazi leAfrica, kabalakudla ngoba umnotho usugugudeke okumangalisayo.
“Emphandleni abantu abedlula izigidi ezinhlanu, 5.5 million, kabalakudla njengoba kungelazulu okwenza ukuthi bengavuni lutho emasimini. Emadolobheni kulabantu abedlula izigidi ezimbili, 2.2 million, abangela kudla njalo abangenelisi ukuthola okuvela kuhulumende okugoqela ezempilakahle kanye lamanzi ahlambulukileyo.”
UElver uthi kuyethusa lokhu okubangwa yikumemetheka kwenkohlakalo eZimbabwe lokunye okunenginengi.
“Inani leli labantu ababhekane lendlala liyethusa. Lokhu kuqhubekela phambili ngenxa yokuswelakala kwemisebenzi, ubukhohlakali, ukukhuphuka intengo yempahla mahlayana, ukungenelisi ukuthenga ukudla lempahla etshiyeneyo, ukwehluleka ukulima, isimo esibi somkhathi, ukuswelakala kwezulu lezijeziso zenotho (ezafakelwa inkokheli yebandla leZanu PF) ngamazwe entshonalanga.”
UElver uphinde wathi abesifazana lamantombazana sebephila ngokuthengisa imizimba yabo ngoba sebesehluleka ukuziphandela impilo.
Uthi labantwana labo sebephila nzima ngenxa yokuswelakala kokudla emaphandleni lemadolobheni.
Uthi abantwana abanengi kabatholi ukudla okufaneleyo okubenza bengakhuli ngemfanelo.
UElver uthi uhulumende kumele alungise ezomnotho kanye lezombangazwe ukuze ilizwe leZimbabwe lenelise ukuba lokudla okwanele uzulu.
“Uhulumende kumele ayekele umkhuba wokuthengela uzulu ukudla kwamanye amazwe. Kumele azame ukukhanga abantu ukuthi balime ingqoloyi lokunye okungabaphilisa. Kumele uhulumende akhuthaze abantu ukuthi balime okwendulo okuhambelana lesimo somkhathi elizweni.”
Uthi okunye okuhluphayo yikuthi abantu abalambileyo batshona phandle kwamabhanga bedinga imali.
“Ngibone okuzwisa ubuhlungu eHarare okulabantu abatshona phandle kwamabhanga belambili bedinga imali kuthi njalo abanye batshona kundwendwe zokudinga amafuthe ezimota lokukha amanzi.”
Uthi izibhedlela zikahulumende azisenelisi ukwelapha abantu ngoba odokotela bakhalala umsebenzi njalo “kusobala ukuthi ukudla kunikwa abantu abasekele ibandla elibusayo.”
Kodwa uMnu. Perrence Shiri, umphathintambo wezokulima, uthi kungamanga ukuthi uhulumende ubangele ukuthi kube lendlala eyesabekayo kwele Zimbabwe.
UShiri uthi indlala le ibangwa yikukhudumala komkhathi okubizwa ngokuthi yi-climate change.
Ingcwethi kwezokudla, uMnu. Themba Ndlela, uthi kuyadanisa okuvezwa nguElver, obika ukuthi indlala kwele Zimbabwe ibangwa yinkokheli yelizwe.
