Izizalwane zeZimbabwe ezinengi zigijimele esigodlweni seSouth Sudan eHarare ngoLwesibili zidinga umsebenzi okade ukhitshwe ebulenjini beinternet ikakhulu oyokuzilibazisa ebizwa ngokuthi yi-social media.
Abahambe kulesosigodlo abagoqela uMnu. Samson Chitema, uNkosazana Miriam Mugodhi, Mnu. Peter Museve loMnu. James Mukomva bathe bavele endaweni ezinjenge Kwekwe eNkabezwe lakoBulawayo lapho ababoleke khona imali yokugada izimota ukwenzela ukuthi bayedinga umsebenzi eSouth Sudan Embassy.
UMugodhi uthe okwenze waya kulesosigodlo yindlala lenswelo etshiyeneyo ebhakene lemuli yakhe.
Lokhu kugcizelelwe ngabanye laba abathe kade bafuna ukuyasebenza eSouth Sudan loba nje kulempi kulelolizwe ngenxa yokuswelakala kwemisebenzi eZimbabwe.
Bathe ababoni uhulumende webandla likaMongemeli Robert Mugabe lisenza ukuthi umnotho welizwe ubelemisebenzi eyedlula izigidi ezimbili – 2,2 million – njengalokho elakuthembisa likhankasela ukhetho ngomnyaka ka2013.
Ele Zimbabwe libhekane lokugugudeka komnotho okumangalisayo okwenza ukuthi bantwana abaphuma emakolitshini bengatholi imisebenzi.
Ibandla leZanu PF lithi liyazama ngamandla wonke ukuvuselela umnotho welizwe ukwenzela ukuthi uzulu athole imisebenzi.