Bayakhala abalamaphepha okusebenza lokuhlala kwele South Africa aweSpecial Zimbabweans Special Permit abathi ukuvalwa kwawo kuzakwenza balahlekwelwe yimisebenzi.
Uhulumende wakwele South Africa ubike izolo ukuba useluvala uhlelo lolu olulabadabuka eZimbabwe abafika phose inkulungwane ezingamakhulu amabili – 178,000.
Abantu laba banikwe umnyaka ukuba balungise amanye amaphepha azabenza behlale njalo besebenze okusemthethweni kwele South Africa.
Omunye wabakhalayo nguNkosazana Sobala Ndlovu, odabuka eMatshetsheni esabelweni seMatabeleland South.
UNkosazana Ndlovu uthi ulakho ukulahlekelwa ngumsebenzi.
UMnu. Nhlanganiso Tshuma, osebenza endaweni yokudlela, laye uthi uthithibele ngokwethulwe nguhulumende.
Banengi abanye abathi bekuvele kuzikhanyela ukuba uhulumende kaMongameli Cyril Ramaphosa uzavala uhlelo lolu. Omunye wabalombono lo nguMnu. Sipho Ngulube, laye olamaphepha la.
Uhulumende wakwele South Africa uthwaliswe nzima ngabanye abadabuka kulelolizwe abathi izizalwane zakwele Zimbabwe zithatha imisebenzi yonke.
