Zitshaya umpululu izinkulungwane zezizalwane zeZimbabwe ngemva kwesimemezelo sikamongameli Cyril Ramaphosa sokuthi indawo abasebenza kuzo ngobunengi ezigoqela ezokudlela, amahotela lezokulungisa inwele sezivunyelwe ukuvula lokusebenza ngokugcweleyo.
Isimemezelo sikamongameli Ramaphosa lesi besilindelwe ngamehlo abomvu yizizalwane zeZimbabwe abese ziqede phose inyanga ezimbili zihleli ezindlini.
“Ukuvulwa kwalezi indawo kuphelekezelwa yimithetho eqine kakhulu okuzafuze kubelobufakazi bokuthi umuntu wonke uyayizwisisa kungakavulwa.”
Izinkulungwane zezizalwane zeZimbabwe kweleSouth Africa zisebenza endaweni zokudlela lapho inengi lazo ezipha ukudla ematebulini (waiters and waitresses ngolwemzini). Abanye njalo basebenza emahoteleni besenza umsebenzi ofanayo kanye lokulungisa izindlu zezihambi.
Isizalwane seZimbabwe, uMnu. Ndumiso Ndlovu, uthi balemukela ngezandla zombili leli nyathelo njengoba inengi lalaba bantu besebephila nzima kakhulu kwazise abanye sebexotshiwe lalapho abahlala khona.
“Most of abantu eGoli basebenza emareasturant. Abanye ngamawaiter baphila ngakho. For many years besiphila ngakho. Lamasalon abanye baphila ngakho bathembele lapho. Bekunzima kakhulu ngaleso simo ekade sikhona. Ukuhlala eGoli kulezindleko zakho. Kumele udle, kumele ubhadale irent but ma uvele ungalanto oyenzayo, uzobhadala ngani, uzodlani?”
Esinye isizalwane seZimbabwe, uMnu. Jonathan Mbedzi, uthi vele akusazwisiseki ukuthi yindaba kusalamanye amabhizimusi okuthiwa engasebenzi kanti vele abantu sebengcwele phandle.
“I think in reality abavule yonke into isebenze ngoba there is nothing abayenzayo ebonisayo ukuthi ingavikela umkhuhlane ukuthi ungamemetheki uye kwezinye indawo because angiboni usizo lwakhona to be honest.”
Ngokwesimemezelo sikaRamaphosa, imihlangano emikhulu layo isizavunyelwa kodwa kodwa hatshi labantu abanengi kakhulu sikhathi sinye. Indawo zamabhayisikopo, ezemidlalo yokulingisa lazo sezivunyelwe ukuvula phansi kwemithetho eqinileyo.
Imidlalo efana le Golf, iTennis, iCricket leminye engelakuthintana kwabadlali layo isivunyelwe. Le elokuthintana okunengi ivunyelwe kuphela ukulolonga abadlali hatshi ukuncintisana.
Kodwake abanye bathi umangoye uyasola ngalezi imvumo eziza ngesikhathi igciwane lecoronavirus lisidla amahabulo kweleSouth Africa.
Abahlaselwe yileli gciwane sebesedlula izinkulungwane ezingamatshumi ayisitshiyagalombili (80,000) kanti sebesedlula inkulungwane lengxenye asebefile (1600).
