Umphathintambo wezangaphandle kwelizwe, uMnu Sibusiso Moyo, lequla lakhe batshaywe, bathethiswa bathelwa ngamanzi ngabalandeli benhlanganiso ezitshiyeneyo eBhilithani ngoLwesihlanu.
Abagijimise uMoyo labanye bakhe bagoqela amalunga ebandla leMovement for Democratic Change elikokhelwa nguMnu. Nelson Chamisa, inhlanganiso yeRestoration of Human Rights Zimbabwe lezinye ezimbalwa.
UMoyo uthe ephuma eChatham House lapho abekhuluma khona ngezomnotho eZimbanwe watshayisana labantu abatshengiselayo abahle bamthela ngamanzi, batshaya abamlondolozayo njalo bamthuka ngenhlamba ezesabekayo.
Bazame ukuvimba imota ebimthwele ukuthi ingahambi kodwa umtshayeli usuke ngesiqubu esikhulu wabaleka.
Abatshengiselayo labo bathi uhulumende weZimbabwe uhlukumeza amalungelo oluntu ebopha inkokheli labalandeli bamabandla aphikisayo.
Ababotshiweyo bagoqela uMnu. Job Sikhala, umsekeli womgcinisihlalo webandla leMDC, owetheswa icala lokukhuthaza abantu ukuthi bagenqule umbuso kaMongameli Emmerson Mnangagwa.
Uhulumende uthi kubi kakhulu okwenziwe ngabantu laba.
UMnu. Nick Mangwana obehamba loMoyo utshele uzulu kumbiko awethule enkundleni yeTwitter ukuthi abenze lokhu yizigangi.
“Sithi kubi kakhulu lokhu okwenziwe ngabantu laba abahlasele iziphathamandla zikahulumende ebeziphandle kweChatham House eLondon. Kuyayangisa ukuthi ukutshengisela okwenziwa eZimbabwe okwenza abezomvikela bangenele sokusenzakala emazweni. Lokhu kuyangisa uhulumende, abenza lokhu labantu abathanda ukuthula eZimbabwe.”
UMangwana uthe loba kunjalo lokhu akuphambanisanga imihlangano eyenziwe nguMoyo ohlangana labosomabhizimusi abatshiyeneyo.
Umhlangano omkhulu olandwe nguMoyo eBhilithani ubizwa ngokuthi yiGlobal Conference on Media Freedom.