Ilizwe leMelika likhangelelwe ukuba ngoMgqibelo lizakwenza isikhumbuzo sokuhlaselwa ngamalwecatsha ngoMpandula 11, ngomnyaka ka2001.
Amalwecatsha eAl-Qaeda atshayela indizamtshina ezimbalwa zabhidliza izakhiwo ezilohlonzi iWorld Trade Center njalo eyinye indazamtshina yaphoselwa esigodlweni sebutho ePentagon duzane leWashington DC.
Eyinye njalo yacina iwela egangeni ePenyslvania abantu ababeyigadile belwisana lelwecatsha elalifuna ukuyayiphosela kwesinye isakhiwo. Kwabhubha inkulungwane ezintathu – 3,000 kusehlakalo lesi elizweni lonke.
Owayengumongameli ngomnyaka ka2001, uMnu. George Bush, wathi abantu abenze lokhu ngabadlelana lamazwe agoqel eleIraq leleAfghanistan lapho okwakubusa iTaliban. UBush wavusa impi emazweni la kwabulawa amasotsha eMelika amanengi njalo labantu kwele Afghnistan lwakwele Iraq.
Kwathi uMnu. Barack Obama esengene esikhundleni sikamongameli, wadinga owayekhokhela amalwecatsha eAlqaeda uBin Laden wamthola kwele Pakistan lapho abulawa khona libutho leMelika laphosela isidumbu sakhe elwandle.
Namuhla siqala udaba lolu ngokukhuluma loMnu. Raphael Mthombeni, odabuka eZimbabwe ohlala eDallas, Texas, kwele Melika.
UMthombeni uthi kwethusa umhlaba wonke okwenziwa ngamalwecatsha eAl-Qaeda.
