Ingcwethi ezicubungula ezombusazwe zithi izijeziso zenotho ezafakelwa eleZimbabwe zingasuswa nxa leli lizwe libuswa kuhle kungela kwephulwa kwelungelo loluntu. Lokhu kuphuma ngaphambilini kokunanzwa kwekhefu elibikwe nguMongameli Emmerson Mnangagwa elika mhlaka 25 Mfumfu ele Anti Sanctions Day.
Usuku lwe Anti Sanctions Day lwasungulwa eDar-es-Salaam kweleTanzania ngomnyaka ka2019 lapho inkokheli yamazwe angezansi kwezwekazi ye Africa eyeSouthern African Development Community (SADC) yavumelana ukulunanza njengendlela yokusekela uhulumende we Zimbabwe.
Usuku lolu lukhangelelwe ukunanzwa mhlaka 25 Mfumfu minyaka yonke lapho amazwe eyeSADC etshengisela ukuba ami ndawonye leZimbabwe ukuba izijeziso ezaletheswayo azikho emthethweni ngakhoke kumele zikhitshwe.
UMnu. Mbuso Fuzwayo, umqondisi weBhetshu Likazulu, uthi uhlupho lwabantu lweZimbabwe aluveli kuzijeziso lezi ezafakelwa inkokheli yeZanu PF, ezinye iziphathamandla zikahulumende kanye labadlelana lebandla leli.
“Ukuthi namhlanje lilanga le anti sanctions day konke khonokho amaZimbabweans uhlupho lwawo aso masanctions, amaZimbawean uhlupho lwawo yihuman Rights violention icorruption le mis management of the country yilo uhlupjo lwethu ngoba amaNatural resources esilawo ayasikwanisa ukuthi siphile loba silama Sanctions just like uSmith waphila.Ngenxa yokuthi laba abasiphetheyo khathesi basiphethe okocuku bazenzela omathanda so uhlupho lwethu yimis management.”
Ilunga leZanu PF koBulawayo umnumzana Malaki Nkomo uthi iZimbabwe yafakelwa imigoqo ngenxa yenotho ekhona elizweni.
“Ma umuzi usitsha ubonwa ngomakhelwane njalo yibo abalamandla ukuba bancedise ukucitsha lowo mlilo ongabe utshisa lowo muzi.Singakhangela iZimbabwe lilizwe eliphiwe amasanctions liphiwa ngamazwe akhatshana lalo ngoba belenjongo zabo abalazo ikakhulu singakhangela inotho esilazo eZimbabwe, sibesesinanzelela njalo ukuthi amasanctions lawa afanana lomuntu okuthiwa agijime ebotshwe inyawo. Ngeqiniso akula kuphila abantu beZimbabwe kumbe esingathuthuka kumbe siye phambili sibotshwe inyawo ngaleyo ndlela sibona iSADC sibona ingomakhelwane bethu bengabantu abantu abakwaziyo ukuthi lokhu okwenziwa ngamazwe amabili amakhulu iBritain leAmerica kungaphandle komthetho.”
Okhokhela ibandla leMthwakazi Republic Party umnumzana Mqondisi Moyo uthi inkokheli zeSADC azikhangeli uzulu kodwa zivikelana zona zodwa.
“Ama Sanctions akusoze kube lula ukuthi aphakanyiswe, sinanzelela ukuthi iZimbabwe lilizwe elingela mthetho, eliphila ngokuhlukumeza abantu ikakhulu thina emkhonweni weMatabeleland. Kanti njalo sinanzelele ukuthi uhulumende kaMnangagwa ba currupt kakhulu, bahlukumeza abantu. So akulula ukuthi ama Sanctions aphakanyiswe ngezizatho lezi. Okunye i-SADC esikunanzelelayo yikuthi yi club kumbe ngumanyano wama President lababusi abavikelanayo bodwa kungela abakuncedisa loba besiza abantu abahluphekayo.
UMnu. Effort Ncube, ingcwethi kwezombusazwe, uthi izijeziso ezafakwayo zafakwa ngoba kulokuphambanisa okwakukhona.
“Izijeziso ngeke zisuswe yikuthi kulabantu abalala behlabela kumbe abatshona behlezi ngaphandle kwamawofisi athile, okudingakalayo yikuthi laba abenza ububi bayeke ububi bahloniphe amalungelo abantu bahloniphe umthetho lempilo yabantu beZimbabwe babuse kahle ilizwe bengenza njalo izijeziso ziyasuswa ngokuba zafakwa ngenxa yokuba ababusi kahle zizasuswa nxa sebebusa kahle nxa ukubusa kahle kungekho lezijeziso azisuswa kungakhathelekile ukuthi abakhala zayo bakhalaza besithini ,ukuthi zisuswe izijeziso kudingeka ukuthi benze okufaneleyo.”
Osaphethe isikhundla sommeli weMelika eZimbabwe, uMnumzana Thomas Hastings izolo uhlangane lesithunywa esiqakathekileyo senhlanganiso yomanyano wamazwe owe United Nations uNkosikazi Alena Douhan, bekhulumisana ngenhlelo zeMelika eziphathelane leZimbabwe. Ababili laba bakhulumisane ngezijeziso zenotho lezi uHastings echasisa ukuba zafakelwa ezinye iziphathamandla ezeZanu PF lezikuhulumende hatshi uzulu wonke wase Zimbabwe.
Abogatsha lobudlelwano beMelika lamanye amazwe womhlaba bethule umbiko othi izijeziso zenotho zafakelwa iziphathamandla zebandla elibusayo lezikuhulumende lamankampani labosomabhizimusi abedlelana labo, abephula amalungelo abantu, abaphatheke kunkohlakalo kanye labaphambana lemithetho yelizwe ngombuso wentando kayiphikiswa.
Lumbiko uqhubeka usithi izijeziso lezi zifakelwe abantu abangamatshumi ayisitshiyagalombili lantathu (83) lamankampani angamatshumi amathathu lasikhombisa. Bathi bahlala becubungula uluhlu lwezijeziso njalo nje benanzelela inguquko ekhona kwele Zimbabwe. Izijeziso lezi zivimba laba abantu lamankampani ekukhululekeni ukusebenzisa indlela zemali zeMelika, ngakho ke ukufaka icala izijeziso lezi ukuba yizo ezidala inhlupho zomnotho welizwe leli akuqondanga.
EleZimbabwe kufanele lilungisise imithetho yalo ukuze ihambelana lesisekelo sombuso welizwe.
Indikimba yalonyaka eyokunanza usuku lwe Anti Sanctions Day ithi “Friend to all, Enemy to none: Forging Ahead and Enhancing lnnovation and Productivity in Adversity of Sanctions”.
Amalungiselelo okunanza usuku lolu aqhubekela phambili, lapho uMongameli Emmerson Mnangagwa akhangelelwe ukwethula umbiko wakhe oqakathekileyo.