Inhlanganiso yeSouthern African Development Community ikhangelelwe ukuthi izakwenza umhlangano oqakathekileyo ngoMvulo oweSADC Summit ozahlolisisa okwenzakala emazweni atshiyeneyo.
Abanye abantu bamangaliswa yikuthi akusoze kukhulunywe ngokwenzakala kwele Zimbabwe okulabantu abathi babotshwa mahlayana kulandela ukutshengisela ababefuna ukukwenza emigwaqweni ngoNtulikazi 31 lonyaka bekhonona ngobukhohlakali lokunye okwenzakala eZimbabwe.
UMnu. Thabisani Ncube, olwela amalungelo kazulu, uthi ibandla leZanu PF lihlupha abantu eZimbabwe ngakho-ke bekumele kukhulunywe ngalokhu emhlanganweni lo.
UNcube uthi akulalutho oluzaguquka elizweni nxa kulokhu kubusa ibandla leZanu PF.
Lokhu kusekelwa nguMnu. Justin Jay Moyo, olandela ezombangazwe, othi akukhanyi lokwenziwa nguNkosikazi Beleka Mbete, uMnu. Sydney Mufamadi loMnu. Ngoako Ramatlhodi, izithunywa zika Mongameli Cyril Ramaphosa wakwele South Africa ezisanda kwethekelela kwele Zimbabwe.
UNkosazana Nokuthula Adonsi, laye olandela ezombangazwe kwele Zimbabwe, uthi kuyethusa okwenziwa nguhulumende kaMongameli Emmerson Mnangagwa.
UMnu. Wellington Moyo, okubandla leZanu PF, uthi okwamanje akulankinga kwele Zimbabwe ngoba akuladaba oluphanyekwe kuhlangothi olubona ngezomvikela kunhlanganiso yeSouthern African Development Community. Ngakho-ke uthi ukuhlupheka okubhekane labantu eZimbabwe yinto eyenzakala emhlabeni wonke jikelele.
UNkozikazi Barbara Tanyanyiwa uthi kunengi okuhlupha abantu kwele Zimbabwe.
Inhlanganiso elwela amalungelo kazulu eyeZimbabwe Lawyers for Human Rights ithi kulabantu abedlula amatshumi ayisithupha ababotshwa nguhulumende othi babefuna ukugenqula uhulumende webandla leZanu PF.
