Kuhlandla lapho esikhangela isimo sombusazwe eZimbabwe ngoLwesithathu sixoxe loMnu. Rugare Gumbo omunye wabaxotshwa kuZanu PF asebebumba ibandla elithiwa yi People First.
UGumbo uthi sokudumela emansumpeni ukuthi ibandla leli libunjwe. 'Sokuseduze ukuthi sibumbe ibandla leli. Abantu kumele babekezele." Uthi bazimisele ukusebenza lamanye amabandla ukulungisisa konke okuhluphayo elizweni. “Thina sifuna ukusebenza labantu bonke hatshi lokhu okukhulunywa ngamanye amabandla ngafuni ukusebenza labanye.”
Uqhubeke esithi kutsho okunengi ukuthula kukaNkosikazi Joice Mujuru owayengumsekeli kamongameli owaxotshwa kuZanu PF ecatshangelwa ukuthi ufuna ukukhipha uMongameli Robert Mugabe esikhundleni.
“Siyabona ukuthi abanye abantu sebemelele ukuthi sibumbe ibandla leli. Ukuthula kukaNkosikazi Mujuru kutsho okunengi. Kaphelelwanga ngumcabango. Ucabanga insuku zonke ukuthi kulungiswe konke okuhluphayo eZimbabwe.”
Uthe abantu akumelanga bacabange ukuthi bazakwenza okufana lalokho okwenziwa libandla leZanu PF.
“Singeke sakwenza lokho ngenxa yokuthi saxotshwa kubandla leZanu PF. Singakwenza njani thina saxotshwa kubandla leZanu PF?”
Ukuze lizwe okunengi ngodaba lolu hambani kubulembu beInternet ku – www.voandebele.com. Sizaphinda njalo www.voandebele.com.
Kudaba olufanayo ngoLwesine sizabe sixoxa loNkosazana Thabitha Khumalo umsekeli wesikhulumeli sebandla leMDC-T othi kabasoze basebenza labanye abantu abaxotshwa kubandla leZanu PF.
