Owayengumongameli umuyi uRobert Gabriel Mugabe ungcwatshwa kusasa koZvimba esabelweni seMashonaland West okuyabe kulabomdeni wakhe, omakhelwane, abanye abadlelana lohulumende labangane.
UMnu. Nick Mangwana, okuhlangothi olwethula ezemibiko kuhulumende kaMongameli Emmerson Mnangagwa, uthi umongameli kasoze abekhona emgcwabeni lo.
Okwamanje uMnangagwa ukwele Melika emhlanganweni wamazwe wonke womhlaba jikelele oweUnited Nations General Assembly eNew York.
Ababona ngokwenzakalayo bathi uMnangagwa, owasusa umuyi esikhundleni ngomnyaka ka2017 ebambisana lebutho, kafunakali emgcwabeni lo ngoba uMugabe wabhubha ezonde okumangalisayo ngokuhluthulelwa intambo zombuso.
UMangwana uthi kuzamiswa ukwakhiwa kwesihonqo esaziwa ngokuthi yimausoleum eNational Heroes Acre eHarare obekumele kubekwe umuyi njengalokhu obekufiswa ngumfelokazi uNkosikazi Grace Mugabe, abantwana bakhe lomdeni wonke kaMugabe.
Kubikwa ukuthi uMugabe wacela ukuthi ayebekwa koZvimba ukwenzela ukuthi abamhluthulela intambo zombuso bengakhulumi abakufisayo nxa esetshonile.
Umzukulu kamuyi, uMnu. Leo Mugabe uthi umalumakhe uzabekwa emzini wakhe hatshi duzane lonina, umuyi uBona Mugabe, ngenxa yokuthi akuselandawo yokubeka abantu emathuneni omdeni wakoMugabe.
“Isidumbu sikamuyi silapha koZvimba lapho esizamgcwaba khona eCourtyard emzini wakhe. Asisoze simgcwabe lapho ayefuna khona duzane lonina ngoba akuselandawo emathuneni lawo. Sinanzelele ukuthi abantu basebekhuluma kakhulu ngokugcinwa kwesidumbu sakhe sasesithatha isinqumo sokuthi ayengcwatshwa emzini wakhe phakathi laphakathi kwezindlu. Ngesikhathi lesi sizabe sizenzela okwethu. Sikhangelele ukuthi kuzabe kulabantu ababiziweyo kuphela. Sibone ukuthi isakhiwo lesi obekumele abekwe khona eNational Heroes Acre bekuzathatha isikhathi eside ukuthi angcwatshwe.”
Abanye abantu esixoxe laye bathe sokumele aphunyuzwe umuyi obesebukiswa endaweni ezitshiyeneyo ngendlela eyephula amanya amasiko esintu.
