Kulabanye abantu eZimbabwe abathi uhulumende usebenzisa imali enengi kakhulu ekwelapheni owayengumongameli uMnu. Robert Mugabe osehlale esibhedlela kwele Singapore phose inyanga ezine eselatshwa umkhuhlani ongaziwayo.
Kulabanye njalo abantu abathi kulilungelo lika Mugabe ukuthi ayekwelatshwa emazweni njengoba wayengumongameli welizwe leZimbabwe.
Abangasekeli lokhu bathi kumele uMugabe ayelatshwe eZimbabwe njengomuntu wonke obhekane lobunzima elizweni. Bacabangela ukuthi uhulumende usebenzisa imali enengi ukwelapha uMugabe.
Omunye wabacabanga lokhu nguNkosazana Pretty Mpofu, isakhamuzi sako Bulawayo, othi kuyamangalisa ukuthi iziphathamandla zikahulumende zelatshwa kwamanye amazwe uzulu ehlupheka eZimbabwe.
Lokhu kusekelwa nguMnu. Percy Mcijo, okunhlanganiso yabantu abathenga bethengisa impahla eyeStreetwise Informal Traders’ Association.
Kodwa-ke uMnu. Joseph Tshuma webandla leZanu PF, owake wamela iPelandaba-Mpopoma edale lephalamende, uthi uMugabe ulelungelo lokwelatshwa eSingapore lakwamanye amazwe.
UMnu. George Charamba, owayeyisikhulumeli sikaMugabe engakasuswa esikhundleni, wake wabika ukuthi uMugabe uhlutshwa ngamehlo. Akwaziwa okwamanje ukuthi uhlutshwa yini.
UDokotela ozimele yedwa, uElophi Sibanda, uthi minengi imikhuhlane ehlupha abantu asebekhulile abanjengo Mugabe oseleminyaka yokuzalwa engamatshumi ayisificamunwemunye lane – 94.
UMongameli Emmerson Mnangagwa uthi odokotela baka Mugabe bathi usengcono njalo uhulumende uzaqhubeka emnika konke akufisayo. Kasenelisanga ukukhuluma ngodaba lolu loCharamba, oseyisikhulumeli sikaMnangagwa.
UMugabe wahluthunelwa umbuso libutho ngomnyaka ka2017 lincedisana loMnangagwa, ibandla leZanu PF, uzulu ledale lephalamende.
