Abantu abanengi kwele Zimbabwe bakhala ngomnotho osugugudeke okumangalisayo.
Abanye sebephila ngokupheka amaqebelengwana kuthi njalo abanye sebesidla kanye ngelanga ngenxa yokuswela imali yokuthenga impahla elentengo ephezulu.
Okwamanje isinkwa sesiyi $2.50 kukanti-ke inengi labantu kaliyitholi imali le ngelanga. Kusenjalo, asesilela futhi amafutha ezimota lobanje uhulumende esithi sokulohlelo lokuthwala abantu ngamabhasi eZUPCO emadolobheni.
Inhlanganiso yeConsumer Council of Zimbabwe ithi imuli elabantu abayisithupha kumele ibelemali efika phose ikhulu lamadola - $800 ngenyanga ukwenzela ukuphila okuhloniphekayo.
Ukuze sihlaziye udaba lokugugudeka komnotho, sixoxe loMnu. Busisa Moyo, usomabhizimusi ocebisa uhulumende ngezomnotho lokunye okutshiyeneyo, othi kumele uhulumende akhulumisane labosomabhizimusi, amabandla aphikisayo lenhlanganiso ezizimele zodwa ngokulungisa umnotho obhidlikayo.
“Kumele kwenziwe lokhu nxa sifisa ukuthi umnotho welizwe ulunge … Ibond note yinto encane ngoba into enkalakatha yilawa ama electronic balances athiwa ngama RTGS (Real Time Gross Settlement). Ibond nxa silikhangele icirculation kuyabe kule $400 million. Kodwa ama electronic balances imali esithi yiRTGS le itshaya kuma $11 billion. Yikho okuyinkalakatha lokhu okwama bond notes ngumdlwane lokhu.”
Uzulu usanda kutshengisela emigwaqweni ekhonona ngesimo esibi somnotho welizwe.
Uhulumende wakuchothoza lokhu wasebenzisa amasotsha lamapholisa ukuthi kuvinjwe abatshengisela emigwaqweni.
Kulabantu abalitshumi lambili abafa ngesikhathi lesi abanye abalimala kubi kwathi abedlula inkulungwane bavalelwa entilongweni lapho abamelele ukuthoniswa amacala. Abanye babo sebegwetshwe okwethusa uzulu ngoba bazahlala entilongweni okweminyaka eyedlula amatshumi amathathu kulandela ukutshengisela kwabo okuthiwa kwabhidliza izakhiwo ezinengi zikahulumende lamabhizimusi azimele wodwa.
