Isizalwane seZimbabwe esasisebenzela uhulumende saxotshelwa ukuthi satholakala sisemdlalweni weKhisimusi ewoteleni duzane ledolobho lakoBulawayo lapho esabotshwa khona sahlawuliswa imali yefine, ngamapholisa yokuthi sasisemdlalweni wezitabane ongelamvumo, sesilwisana lokuxotshwa umsebenzi edale lomthethwandaba eleLabour Court.
UMnu. Raymond Sibanda wayesebenzela uhlangothi lukahulumende olubona ngezabasakhulayo. Yenake wabhadaliswa ifine le phansi kweziqondiso zomthetho owesulwayo oweMiscellaneous Offices Act esetheswa icala lokwenza okungekho emthethweni emphakathini.
Umdlalo lo wawuqoqwe yinhlanganiso yezitabane eyeGays and Lesbians Association of Zimbabwe.
Uhulumede uthi wayangisa kakhulu uSibanda ukuthi angene umdlalo lo njalo wephula iziqondiso zePublic Service Commission.
Ufuna ukuthi iLabour Court ikubeke sobala ukuthi ukubhadala kwakhe imali yamapholisa akutsho ukuthi uyisitabane. Igqwetha lakhe uMnu. Emmanuel Mlalazi uthe kalamvumo yokukhuluma ngodaba lolu olukhangelelwe ukuthi luzaqalisa ukuthoniswa ngenyanga ezayo.
Ukuze sihlaziye udaba lolu, sixoxe loMnu. Mojalifa Mokoele wenhlanganiso ekhangelane lamalungelo emacansini eye Sexual Rights Center othe kuyabukeka okwenziwe nguSibanda.
Siphinde saxhuma uMnu. Sobusa Gula Ndebele owayeligqwetha elikhulu lelizwe othe okungalahlisa uSibanda yikuthi wabhadala imali emapholiseni yokuvuma ukuthi wayelecala ngakhoke icala likhona.