UProfessor Jonathan Moyo, umphathintambo wezemfundo ephezulu, ukhangelelwe ukuthi uzakuya emthethwandaba kusasa lapho azathoniswa khona icala lokwebiwa kwenkulungwane ezingamakhulu amane amadollar – $400,000 yohlangothi lukahulumende olunceda izifundi olwe Zimbabwe Manpower Development Fund.
Amaphepha agoqela eleHerald lamanye ambalwa abika ukuthi uMoyo ukhangelelwe ukuthi uzathoniswa lomsekeli wakhe uDr. Godfrey Gandiwa ocatshangelwa ukuthi weba laye imali le okwakumele incede izifundi emakolitshini.
UMoyo izolo uhambe wayabonana labakukomishini yeAnti-Corruption Commission ephendla udaba lolu lapho abuzwe khona okwesikhathi eside ngemali le.
UMoyo uthi wasebenzisa imali le ukuqhuba inhlelo zebandla leZanu PF lokuthengela inkokheli zomdabu amabhayisikili.
Kulembiko ethi uDr. Gandiwa usebotshiye. Kasenelisanga ukukhuluma ngodaba lolu loGandiwa, uMoyo kanye lamapholisa.
Ukuze sihlaziye okwenzakalayo, iStudio 7 ixoxe loMnu. Joseph Tshuma omele iPelandaba-Mpopoma kudale lephalamende ekubandla leZanu PF loDr. Nkululeko Sibanda, ingcwethi kwezombusazwe osekolitshini leHuddersfield University eBhilithane.
UTshuma uthe, “IZimbabwe lilizwe elilomthetho ogcweleyo ngakho-ke kumele umthetho ulandelwe unjalo. Nxa umuntu esetheswa icala kumele azikhulumele icala lakhe.”
Lokhu kusekelwe nguDr. Sibanda ogcizelele esithi akumelanga ukuthi kukhethwe abantu okumele bahanjiswe emthethwandaba nxa kusenziwa amacala anje.
Uthe kuvele kuvamile ukuthi ezinye iziphathamandla zikahulumende ezikubandla leZanu PF zitshaphaze imali kazulu.