UNkosazana Precious Sibalo, owaqala izifundo emaphandleni ePlumtree esabelweni seMatabeleland South, utshayela indizamtshina ezibalisa ezohlobo lwama helicopter lezinye.
UNkosazana Sibalo, othi wayetshaywa luvalo esikolo nxa esenza izifundo zeMathematics, uthi uyakuthakazelela akwenzayo njengomuntu owake wasebenza ukunika abantu ukudla ezindlini zokudlela ezibizwa ngeSilungu ngokuthi ngama restuarants.
Uthi unina, owambeletha eleminyaka elitshumi lasikhombisa, watshona esesemncane okwamenza wasebenzela ukunceda umdeni wakhe. Wasebenza ezindlini zokudla lapho ayehlangana khona labantu abanengi ababembuza ngafisa ukukwenza.
UNkosazana Sibalo, owafunda eKungubo Primary School ePlumtree wasesiyafunda eMhali Primary School koBulawayo leMtshabezi Mission, waxwayiswa ngabanye abantu ayehlangana labo ezindlini zokudlela ukuba adinge umsebenzi eQatar Airways eDubai.
Wangena umsebenzi wokuhlolisisa okwenzakala kundizamtshina owe-air hostess ezimisele ukuba ngumtshayeli wendizamtshina.
Uthi okwamenza wangena umsebenzi lo yikuthi wayebone abatshayeli bendizamtshina abangamadoda bodwa eJoshua Mqabuko Airport ngesikhathi esethekelela kuleyo ndawo esesikolo labanye ababefunda eMhali.
“Kwangikhathaza kakhulu ukubona abatshayeli abangamadoda kuphela. Ngazitshela ukuba kumele ngitshayele indizamtshina ukuze ngimele abasifazana.”
Ngokuya kwesikhathi, esebhujelwe ngunina, wasebenza ezindlini zokudlela kwele South Africa engakahambi eDubai lapho aqhatshwa khona phakathi kwabantu abayisithupha ababedinga umsebenzi.
Wasebenza eQater Airways okweminyaka emihlanu ehamba labatshayeli bendizamtshina isikhathi sonke. UNkosazana Sibalo uthi kulapho adingisisa khona ukuba angatshayela njani indizamtshina.
Bamtshela ukuba kumele ahambe e43 Air School kwele South Africa okufundelwa ukutshayela indizamtshina.
Okwamanje wenza izimanga phakathi kwendizamtshina. Usefundela lokufundisa abafisa ukutshayela indizatshina. Ulecence elilohlonzi lokutshayela imihlobo eminengi yendizamtshina. Okwamanje utshayela indizamtshina azihlawulela okwesikhatshana ukwenzela ukuba athola okufunakalayo ukuba atshayele indizamtshina ezinkulu ezinjenge Qatar Airways.
