Abantu abanengi bathi kabasenelisi ukuziphilisa ngenxa yokukhuphuka kwentengo yokudla lokunye abakusebenzisa nsukuzonke.
Uhlangothi olubona ngokubalwa kwabantu, okwenzakala kumnotho welizwe lokunye okumbalwa olweZimbabwe National Statistics Agency luthi imuli elabantu abane abahlala edolobheni sebekhangelelwe ukuthi basebenzise imali efika phose inkulungwane ezilithumi zamadola eMelika ngenyanga – ZW$8,400.
Izisebenzi ezinengi eZimbabwe zihola imali efika ZW$3,000 ngenyanga. Lokhu kwenza kubenzi ukuba bathenge impahla abayisebenzisa ngenyanga.
Abantu abanengi abakhulume lomsakazo weStudio 7 bathe sebethwele amagabha avuzayo ngoba kabalamali yokuziphilisa.
Omunye oveze ukukhathazeka ngobunzima bempilo nguNkosikazi Nomusa Phiri, isakhamuzi seHarare, othi imali le esidingeka engaphilisa imuli ngenyanga inengi kakhulu.
“Ibread basket khathesi eZimbabwe eyabantu abahlanu isiyi8,400. Lokhu kuthwalisa nzima abantu beZimbabwe ngoba balutshwan abayiholayo leyo mali. Izisebenzi zikahulumende zihola imali efika 3,000 okwenza ukuphila kube nzima.”
IZimstats iveze ukuba ukuba ukukhuphuka kwesisindo sedola leMelika yikho okwenze kwakhuphuka njalo imali efunakalayo ngenyanga eyokuphilisa imuli elebantu abane.
Inhlanganiso yeZimbabwwe Congress of Trade Unions (ZCTU) yazise ukuba uzulu kumele atshengisele emigwaqweni ekhonona ngomumo oselizweni ngoba imali eholwa ngabantu ilihlazo.