Ngesikhathi umkhokheli webandla lenkonzo yeRoma uPapa Francis, elungiselela ukuphetha uhambo lwakhe lokwethekelela iMelika ngoMgqibelo, amalunga ebandla leli kweleSouth Africa asemcome kakhulu ngokukhuthaza ukuthi abayanga banakakelwe.
AmaRoma kweleSouth Africa athi kukho konke akhulume ngakho bathokoziswe yindlela angavumelani ngayo lokuthi kubekhona abalamaqubaquba emali lenotho, bayigodle, bazitike ngayo bodwa, kodwa kulabanye abalala ngengqwe zomlomo.
Sekukanengi uPapa Francis esola umkhuba wohlelo lwecapitalism, esithi yenza inotho igodlwe ngabalutshwana inengi lisidla imbuya ngoluthi. Esethula inkulumo yakhe esigodlweni sikamongameli Barack Obama eWashington, uPapa ubuye wakubeka kwacaca ukuthi icapitalism yisitha soluntu.
Isizalwane seZimbabwe, uNkosazana Samukeliso Ndlovu olilunga laleli bandla uthi kungenxa yalesisizatho uthola eZimbabwe sekulabantu abanothe ukwedlula ilizwe abaphila kulo.
Kulelibandla-ke imfundiso kaPapa Francis yokuthi kwabelwanwe yinto abayizwa bayizwisisa. Kulequla labazalwane abazibiza Cathedral Care team. Labake bakhipha imali ezambeni zabo, bathenge ukudla abakuphekela abahluphekayo.
Omunye wabathola usizo lolu yisizalwane seZimbabwe umnumnzana Lucky Ncube yena othi bayathokoza kakhulu.
UBhekimpilo Dladla oleminyaka elitshumi ngomunye wezingane ezithola lolusizo. Lezingane zithi zingasutha izisu sezibomvu zidumise uMvelingqangi ngamaculo.
Okhokhela iqula le Cathedral Care Team unkosikazi Heather De Mink uthi imfundiso kaPope Francis yokuthi phansi ngeCapitalism iqonde nta.
Okhokhela ibandla leCathedral Church of Christ the King, uFather Thabo Motshegoa uthi imfundiso kaPapa Francis le yokwabelana yinsika yoluntu.
Le ke yinto ibandla lakhe elithi lizahlala liyitshumayela ngezenzo langamahubo.