Amapholisa eZimbabwe asebophe uMnu. Jacob Ngarivhume, oqoqa ukutshengisela okumele kwenziwe nguzulu ekupheleni kuka Ntulikazi, kanye loMnu. Hopewell Chin’ono, intathelizindaba ezimeleyo eloba ngokungethembeki kweziphathamandla zikahulumende lokunye.
Ababili laba babotshwe ngesikhathi besanda kwethula imibiko ethi kulabantu abathi bazababulala ngalokhu abakulobayo ebulenjini bokuxhumana obeTwitter kanye lokuqoqa ukutshengisela emigwaqweni.
Isikhulumeli samapholisa, uSenior Assistant Commissioner Paul Nyathi, wethule umbiko oveze ukuba ababili betheswa amacala okutshotshozela udlakela.
Amagqwetha amele ababili laba athi bathethwe ngabacatshangelwa ukuthi ngamapholisa ensitha kahulumende kaMongameli Emmerson Mnangagwa.
UNgarivhume wenza umkhankaso obizwa ngokuthi '31st July Movement' osekelwa ngabantu abaphikisa uhulumende kaMnangagwa abathi ubusa ngochuku njalo wenza ukungethembeki okumangalisayo.
Uthi abantu bazatshengisela besola ukungethembeki kukahulumende lokunye okuhluphayo elizweni.
UChin'ono useveze ukungethembeki okwenzakala kuhulumende okugoqela ukulobelana kwesivumelwano sikahulumende lenkampani yeDrax International esokuthenga impahla yokuvikela uzulu kumkhuhlane weCOVID-19.
Lokhu kwenziwa kungalandelwa iziqondiso zokuthenga lokuthengisa impahla kahulumende. Kwenza ukuba kuxotshwe umsebenzi uDokotela Obadiah Moyo, owayephathe uhlangothi lwezempilakahle okucatshangelwa ukuthi wayesebenza labanye abenza isivumelwano lesi esifika izigidi ezingamatshumi ayisithupha samadola eMelika - $60 million.