IZimbabwe Energy Regulatory Authority (ZERA) isikhuphule intengo yamafutha ezimota ngesilinganiso sokufika phose amatshumi amahlanu ekhulwini (46-49%).
IZERA ithi amafutha epethulo asethengiswa ngeRTGS$4.97 kusilinganiso seliter kuthi amafutha edizili aseyi RGTS$4.89. Iphethulo ibibiza amadola afika kuRTGS$3.36 kusilinganiso seliter kuthi idizili ibifika iRTGS$3.22.
Kulabanye okwamanje asebethengisa amafutha epethulo ngeRTGS$5.00 kusilinganiso seliter.
Lokhu kukhangelelwe ukuthi kuzakwenza osomabhizimusi bakhuphule intengo yempahla etshiyeneyo.
IZERA ithi yenze lokhu kulandela okwethulwe libhanga elikhulu lelizwe eleReserve Bank of Zimbabwe ebikele uzulu ngoMvulo ukuthi amafutha ezimota asezathengwa ngemali etholakala emkambo wemali kusiya ngokuthi iRTGS ledola leMelika kuyimalini ngelanga.
Ithi abathengisa amafutha ezimota lokunye okufanayo balakho ukuthengisa okunye okusebenzisa amafutha ePetrolium ngemali ephezulu.
Uzulu watshengisela emigwaqweni ngoZibandlela kulandela ukukhuphulwa kwentengo yepethulo nguhulumende kaMongameli Emmerson Mnangagwa. Kwabulawa abantu abafika itshumi lanye ababetshengisela emigwaqweni besola ukukhuphulwa kwentengo yepethulo.