Bayakhala abalamabhizimusi ezimota ezithwala uzulu abathi bangeke basebenze bephansi kwenkampani yeZimbabwe United Passenger Company (ZUPCO).
Sokulomnyaka selokhu uhulumende wafaka imithetho evimba imitshova ukuba isebenze emadolobheni njalo lethwala abantu abaya emazweni atshiyeneyo.
Abalemitshova batshelwa ukuthi basebenzelane leZUPCO, eyehluleka ukuhlawula iholo lezisebenzi, ukwenzela ukulwisana kahle legciwane leCOVID-19.
Kodwa kulabanye abanikazi bezimota lezi abanjengo Mnu. Mandla Ndiweni abathi sebethathelwa amabhizimusi abo yiZUPCO.
UNdiweni uthi akuzwakali okwenziwa yinkampani yeZUPCO. Uthi amapholisa atshaya izimota zabo okwethusayo.
Omunye njalo ohlutshwa ngokwenzakalayo nguMnu. Bulisani Nxumalo, olebhizimusi yezimota ezithwala abantu.
UNxumalo uthi akusasebenzeki okwamanje ngenxa yokwenziwa ngamapholisa leZUPCO.
Uyakhala njalo loMnu. Mbonisi Msimanga.
UMsimanga uthi usesehluleka ukuphandela ukudla umdeni wakhe.
Isikhulumeli samapholisa koBulawayo, uAssistant Commissioner Abednico Ncube, uthi kulezimota ezifika amakhulu amane ezibanjwe ngamapholisa.
Konke lokhu kwenzakala kulabantu abalimala nxa imitshoba ithathwa ngamapholisa. Omunye wabo nguNkosazana Amanda Sibanda.
UMaSibanda uthi kunzima ukuya ezibhedlela umuntu engalimala umtshova ungabhewuka uxotshaniswa ngamapholisa.
Akwaziwa ukuba ukuxokozela lokhu kuzaphela njani njengoba uhulumende esithi kazisoze zivunyelwe emigwaqweni imota ezithwala abantu zingabhalisanga kunkampani yeZUPCO.