Uhulumende wakwele Zimbabwe ubikwa ukuthi usexotshe umsebenzi abongi ezedlula inkulungwane ezilitshumi lanhlanu - 16,000 - ebezikhalala umsebenzi.
Umsakazo weZimbabwe Broadcasting Corporation ubike ngoLwesibili ntambama ukuthi omongi laba betheswa icala lokungalandeli izinqumo abazithathe lohulumende ukuthi babuyele emsebenzini.
Umsakazo lo ubika ukuthi izisebenzi lezi zixotshwe umsebenzi ngumsekeli kamongameli uRetired General Constantino Chiwenga othi uhulumende ubesenike uhlangothi lukahulumende lwezempilakahle izigidi ezedlula itshumi lesikhombisa zamadola - $17,114.446 - yokubhadala omongi laba.
UChiwenga uthi lokhu osokusenziwa ngomongi yikungena kwezombusazwe hatshi ukukhonona ngemali.
Uthi okwamanje sebedinga bonke abafundela umsebenzi lo labasuka emsebenzini lo ngenxa yokuluphala ukuthi bakhulumisane leHealth Service Board eqhatsha omongi labongikazi.
Kodwa-ke unobhala jikelele weZimbabwe Nurses’ Association, uMnu. Enock Dongo, uthi bazwe ukuthi sebexotshwe umsebenzi emsakazweni weZBC.
Uthi kuyamangalisa okwenziwe nguChiwenga ngoba bebekhulumisana kahle lohulumende ngezikhalazo zabo ezigoqela ukukhuphulwa kweholo lama allowances atshiyeneyo.
Uthi umphathintambo wezempilakahle, uDokotela David Parirenyatwa, nguye oqambele uChiwenga loMongameli Emmerson Mnangagwa amanga ngokukhalala kwabo umsebenzi.
Uthi bafisa ukuthi bahlale phansi loMnangagwa bemlandisele ngezikhalazo zabo.
Kasenelisanga ukukhuluma ngodaba lolu loChiwenga leziphathamandla zohlangothi lukahulumende olubona ngezempilakahle.