Uzulu ukhangelelwe ukuthi uzatshengisela emigwaqweni kusasa koBulawayo kulandela ukukhahlanyezwa kwenduna uNhlanhlayamangwe Ndiweni ngamapholisa ensitha.
Amapholisa la azame ukuthatha imota yenduna esithi athunywe yiwofisi kaMongameli Emmerson Mnangagwa ezondiswe ngakwethule ngezijeziso zenotho ezafakelwa inkokheli yebandla leZanu PF kanye lokuvikela indawo lapho okwabunjwa khona isizwe sikaMthwakazi eNtabazinduna.
UMzilikazi wasusela amanqe izinduna eNtabazinduna ezazizama ukufaka omunye wabantwana bakhe esikhundleni kungaziwa ukuthi wayangaphi.
UNdiweni uthi indawo le isigcwele abantu bokuza abalakho ukungena endaweni leyo eligugu ebantwini abadabuka eMatabeleland leNkabazwe.
Uhulumende uthi okwenziwa nguNdiweni kutshengisa ukuthi udelela uhulumende kaMnangagwa.
UMnu. Victor Madematanda, umsekeli kamphathintambo kahulumende obona ngezomvikela labalwa impi yenkululeko, uthi uNdiweni kangene kwezombusazwe nxa efuna ukulwisana lohulumende kaMnangagwa.
Ibandla leZanu PF lalo lithi uNdiweni kukhanya esifuna ukungena kwezombangazwe ngakho lokhu asekwenzi sokuveza ukuthi usekela amabandla anjenge Mthwakazi Republic Party leMDC Alliance.
UNdiweni uyakuphika lokhu.
Abasekela umkhankaso kaNdiweni awubiza ngokuthi ‘Save Ntabazinduna Mountain’ bathi yenza kahle induna ezama ukugcina amasiko esintu.
Omunye omsekelayo nguMnu. Thembelani Moyo ohlala eJotsholo esabelweni seMatabeleland North, othi uNdiweni ufela amafufu njengegundwane.
Induna uMathema oweNqameni uthi imota abazinikwa nguhulumende ngezabo hatshi uhulumende.
