Abalandeli bebandla leNational Patriotic Front, esanda kusungulwa, bathi baxotshwa kubandla leZanu PF ngenxa yokuzama ukuthi kubelabatsha abazathatha intambo zombuso kulabo asebeluphele.
UNkosikazi Sandi Moyo, obambe isikhundla sikamngcinisihlalo webandla leli okwesikhatshana, uthi bazimisele ukufela uzulu ngokulungisa okwenzakala khonamanje elizweni elibuswa nguMongameli Emmerson Mnangagwa lebutho leZimbabwe Defence Forces.
UNkosikazi Moyo uthi balwela izifiso zikamuyi uJoshua Mqabuko Nkomo lowayengumongameli uMnu. Robert Mugabe.
“Okwamanje siyakubona ukuthi akuselabandla leZapu kuleli elibusayo njengalokho okwakufiswa nguMqabuko kanye loMnu. Mugabe. Silwela ukuthi kuqondiswe konke lokhu.”
Uthi ibandla leli lizakwethulelwa uzulu okusemthethweni ngenyanga ezayo.
UNkosikazi Moyo uthe kakwazi ukuthi uMugabe lomkakhe uNkosikazi Grace Mugabe bekubandla leli kanye loSikhwicamfundo Jonathan Moyo, uMnu. Saviour Kasukuwere, uMnu. Patrick Zhuwao labanye okwakuthiwa bakuhlangothi lwebandla leZanu PF olubuzwa ngokuthi yiGeneration 40.
UMugabe wasuswa esikhundleni nguMnangagwa lebutho lelizwe elathi kulabantu ababehanqe uMugabe ababesenza ubukhohlakali obumangalisayo.
UMoyo, uKasukuwere loZhuwao babaleka elizweni ngoLwezi ibutho libadinga njengalokho okwekuhlelwe yinkokheli yalo loMnangagwa.
Abathathu laba kukhanya engani yibo abasebenza gadalala ukuthi kubunjwe ibandla leNational Patriotic Front.
