UMnu. Sybeth Musengezi uthi kulabantu abamethuselayo labanye abathi bazambulala kulandela ukuphanyeka kwakhe emthethwandaba udaba lokuthi kumele uMongameli Emmerson Mnangagwa asuswe esikhundleni sikanobhala jikelele webandla leZanu PF.
UMusengezi uthi uhlutshwa ngabantu abanengi okwamanje abathi waphanyekelani udaba lolu emthethwandaba.
Uchothoze njalo okwethulwe nguMnu.George Charamba, isikhulumeli sikaMnangagwa, othi kayisilo lunga lebandla leZanu PF.
“Kulabantu abangethuselayo. Abanye bathi bazangibulala ngenxa yokuthi ngiphanyeke udaba lolu emthethwandaba. Iqiniso yikuthi uMnangagwa kangenanga esikhundleni ngemfanelo. Wangeniswa ngabangane bakhe. Kumele silungise lokhu. Angitsho ukuthi uMnangagwa asuke esikhundleni sikamongameli kodwa engikutshoyo yikuthi kumele sibelomuntu okhethwe libandla leZanu PF kulandelwa isisekelo sombuso webandla leli. Kubi kakhulu okwenziwa ngomnyaka ka2017 uMnangagwa engena esikhundleni.
“UMnu. George Charamba laye othi kangazi utshoni ngoba yena ukuhulumende hatshi kubandla leZanu PF. Asikhulumi laye ngezebandla. Sikhuluma laye ngokwenzakala kuhulumende. Nxa engakwazi ukuthi mina ngubani ngokwakhe lokhu. Engikhuluma ngakho yikuthi kumele silungise ibandla lethu singabi lomuntu owafakwa esikhundleni esiqakathekileyo ngabangane bakhe.”
Kasenelisanga ukukhuluma loCharamba ngodaba lolu kulandela ukuloba kwakhe ngoMusengezi enkundleni yokuxhumana eyeTwitter esithi kaziwa lundoda.
UMnu. Believe Gaule, umsekeli webandla leZanu PF, uthi uMusengezi ukhuluma angakwaziyo.
Kusenjalo, kulabanye abathi kumele ibandla leZanu PF liguqule isisekelo sombuso ukwenzela ukuthi uMnangagwa abuse okwesikhathi eside. Bathi wenza kahle umsebenzi wakhe.
UMnu. Elifasi Mashaba, olilunga lebandla elibusayo, uthi kulungile ukuba abatsha bafise ukuba uMnangagwa ahlale esikhundleni okwesikhathi eside.
Kodwa uMnu. Felix Magalelela Mafa, umsekeli wesikhulumeli sebandla leMDC Alliance, uthi ibandla leZanu PF seliphelelwe yimicabango.
Ukuxokozela lokhu kwenzakala ngesikhathi ibandla leZanu PF lingungiselela umhlangano omkhulu oweAnnual National People’s Conference.