UNkosikazi Grace Mugabe uthi uMongameli Robert Mugabe sokumele abikele uzulu ngomuntu ozathatha isikhundla sakhe.
UNkosikazi Mugabe, obekhuluma lamuhla eHarare emhlanganweni wamalunga ohlangothi lwebandla leZanu PF olwe Women’s League, uthe kuzaphela ukubanga isikhundla lesi nxa uMugabe engethulela uzulu umuntu ozathatha isikhundla sakhe engatshiya umsebenzi.
UNkosikazi Mugabe uthe lokhu kuyenzakala kwamanye amazwe ngakho-ke akusoze kumangalise uMugabe engakwenza.
"Kwamanye amazwe sabona uMongameli Nelson Mandela akhetha uThabo Mbeki lwakwemanye amazwe sakubona futhi kusenzakala. Lamuhla ngime phambi kwenu khonapha ngifisa ukucela umongameli ukuthi engesabi lutho. Ulakho ukuthi akhethe umuntu amfunayo ... Angamkhetha athi nanti ibhiza lethu lizabona ukuthi ngizakwenzani."
UMongameli Mugabe wakubeka sobala ngesikhathi ethakazelela usuku lwakhe lokuzalwa eMatobo, esabelweni seMatabeleland South, ukuthi kasoze adinge umuntu ozathatha isikhundla sakhe.
UMugabe sebuse ilizwe leZimbabwe okweminyaka engamatshumi amathathu lesikhombisa.