Ibandla leMthwakazi Republic Party lithi lesaba ukuba lingaginywa nxa lingangena kumanyano lamanye ngesikhathi kusenziwa ukhetho ngomnyaka ka2023.
Amabandla ayisithupha abumba umanyano weMDC Alliance ngomnyaka ka2017 kulungiselelwa ukhetho olwenziwa ngomnyaka olandelayo.
Umanyano lo wawukhokhelwa nguMnu. Morgan Tsvangirai, owayekhokhela ibandla leMDC-T, eseliphethwe nguMnu. Douglas Mwonzora.
Ibandla leMthwakazi Republic Party, elikhokhelwa nguMnu. Mqondisi Moyo, lithi imanyano enje yenza ukuthi kuncindezelwe abantu abadabuka eMatabeleland leNkabazwe.
UMoyo uthi kunengi okungahambi kahle kumabandla aphikisayo eZimbabwe.
Kodwa uMnu. Felix Magalela Mafa, isikhulumeli sebandla leMDC Alliance, uthi bayakusekela ukubambana lamanye amabandla akhokhelwa ngabakhuluma ulimi olutshiyeneyo.
Uthi abantu kumele balimuke okwenziwa ngamanye amabandla.
UMoyo uthi kunengi okusobala okubethusayo.
Kambe ilizwe leZimbabwe liyangaphi njengoba amabandla aphikisayo exokozela kangaka.
