Lonyaka kunanzwe usuku lweHeroes Day abantu abanengi bekhonona ngokwenzakala elizweni njalo lokungaqakathekiswa kwabalwa impi yenkululeko bekuviyo leZIPRA.
Uzibuse weZimbabwe ubuye ngomnyaka ka1980 ngemva kwempi yabalwa bekuviyo lebutho eleZipra lele Zanla. IZIPRA liviyo lebutho lebandla leZapu kuthi iZanla liviyo lebutho lebandla leZanu.
Ngemva kwaleyo mpi abalwa bekumacele womabili baphiwa imbandalo yokubalisotsha kuleyompi njengendlela yokubahlonipha kanye lokuhlawula ukulahlekelwa abakwenzayo. Imbadalo leyo kwakuyimali kanye lamapulazi ayenikezwa abasindayo, abefelwakazi kanye lentandane ezatshiywa zingasela bazali. Kodwa imbadalo leyo kukhanya yatholwa kakhulu ngabeviyo leZanla ukwedlula abeZipra.
Loku kufakwazwa nguMnu. Isaac Mabuka, omunye wabalwa impi yenkululeko ekuviyo leZIPRA.
“Into okufanele siyiqakathekise yikuthi sifake abantu bonke abalwela ilizwe phambili hatshi amabandla ayiwo abusayo kumbe afuna ukubusa kungakhethile ukuthi uvela kuyiphi inhlanganiso. Kulungile ukuthi uhulumende ayenze imihlangano yokuthi kuqakatheke ukuthi abantu balwela ilizwe kodwa kungani kuba kubi nxa ufika endaweni lezo ufica sokungani kuthiwa ngumhlangano wenhlanganiso ebusayo kuphela sokucina kusinda abanye abantu abavela kwamanye amabandla sifisa nje ukuthi ngabe uhulumende uyakubona”
UMnu. Moses Mzila, olilunga leZIPRA njalo engumongameli weAlliance for National Salvation, uthi uzulu kumele abekwazi ukuthi inzondo yavela ngaphi kanye lokubandlululwa.
“Kuqakathekile ukuthi uzulu akwazi ukuthi amabutho aweZIPRA yiwo owalwa wehlula amakhiwa kwabangela ukuthi kuyiwe kuLancaster House Conference okwakuqala. Okwesibili uzulu kumele ukuthi akwazi ukuthi ubuqhawe beZIPRA yibo obubangela inzondo evela kuZANU PF ukuthi kusukela ngo1980 ukuthi amabutho eZIPRA kusamele atshabalaliswe bephathisana lamakhiwa. Kunamhlanje nje thina sikhala ngabafowethu ababengamaqhawe abaletha inkululeko ababulawa yiZanu PF befela emajele kusukela kuLookout Masuku kusehla kusiyaphansi yikho sibuhlungu ngendlela esaphathwa ngayo langendlela esiphathwa ngayo namuhlanje nguhulumende ukuthi ngathi ayisithi abantu abalwayo sehlula isitha.”
URetired Colonel Marshall Ndlovu uthi ilanga lamaqhawe litsho abantu abazinikelayo ubuqhawe kungakhethi hlangothi.
Umphathintambo wesabelo sakoBulawayo, uNkosikazi Judith Ncube, uthi akula qhawe elibandlululwayo kodwa abantu nje yibo asebekhohliwe ukuthi amaqhawe amanengi awazange akholisa impilo zabo.
‘‘Abanengi sebekhohliwe ukuthi lababantu esibuthene ngabo namuhla bona balwile bakhulula abakholisi khonokhu okukholiswa ngabanye abantu but sebekhohliwe to an extent ukuthi uzwa abanye abantu besithi lathi sifuna ukuba leyethu impi. Sifuna ukuthi siphe nampa abantu abasenzele umsebenzi hloniphani nampa abantu abasenzele umsebenzi omuhle siyababonga.’’
Ukukhunjulwa komsebenzi wamaqhawe kanye lokuhlonitshwa kwawo kuyindaba elokhe ile nkulumo ikakhulu mayelana lenhlawulo abayitholayo. Abanye abalwa impi yenkululeko bathola inhlawulo enkulu ukwedlula abanye kuthi abanye abafelwakazi lentandane lokhe besele egcekeni kungela obanakekelayo.
