Sokugcwele imali yama bond notes amatsha emigwaqweni eZimbabwe ngesikhathi uhulumende esithi ngoMvulo uzalungisa ukugugudeka kwesisindo sama Real Time Gross Settlement (RTGS) leyinye imali.
Lokhu kwenzakala ngesikhathi uMnu. Mthuli Ncube, umphathintambo wezemali, esanda kubika ukuthi usedinge izigidi ezingamakhulu amahlanu - $500 million yokulwisana lomkambo wensitha wemali owenza kukhuphuke intengo yempahla elizweni.
UNcube wethule umbiko lo ebulenjini bokuxhumana obeTwitter lapho angavezanga ukuthi uhulumende weZimbabwe, okukhanya esehluleka ukuvuselela umnotho, uzayithola ngaphi imali enengi kangaka.
Imizamo yokukhuluma ngalokhu loNcube yehlule ngoba ubengaphenduli umakhalekhukhwini wakhe.
Ingcwethi kwezenotho zithi intengo yempahla kayisoze yehle njengalokhu okufiswa nguhulumende njengoba eZimbabwe kusetshenziswa imali yohlobo lwama RTGS eyenza ukuthi abantu benze santango emkambo wemali.
Isisindo semali ethengwa emabhanga lethengwa emkambo wensitha sokutshiyana okumangalisayo.
Omunye wabathenga bethengisa impahla, uNkosazana Pretty Mpofu, uthi lokhu okwenziwa nguhulumende akusoze kuncede ngitsho lakancane ngoba imali yemkambo wensitha ikhanya ikhutshulwa nguhulumende.
Kodwa uMnu. Believe Gaule webandla leZanu PF uthi abantu abazonda uhulumende yibo abakhuphula isisindo sama RTGS njalo lentengo yempahla etshiyeneyo.
Abantu abanengi bathi kababoni kulungiseka isisindo semali emkambo wemali yensitha ngesikhathi ibhanga leReserve Bank of Zimbabwe lithengisa idola nge3.45 RTGS.
Abanye osiphatheleni kubikwa ukuthi sebethengisa idola leMelika nge7 RTGS.
